uMthunywa
Charles Dube
Kuvuka impi abantu besaphakathi kokujabula eMbijana. Wayeziqhunsa incingo uNdakha abantu besilisa labesifazana sebenamathelene ngezifuba. UNgenzile yena kuthiwa wayesenwayekile yikho nje uNganani wathi equma phakathi kwakhe lejaha owayegida lalo wasemnyathela ithenisi zakhe ayengafuni zingcoliswe wamthethisa ngenhlamba eyesabekayo ethi “uyanginyathela wena nja”.
UNganani yamcaphula kakhulu inhlamba kaNgenzile leyo wathi kuye: “Buzaphela ubumbulu bakho Ngenzile!” Wamangalisa bonke abantu ababelapho uNgenzile esephendule uNganani ngelithi, “Wabukholisa-ke ubumbulu bami.” Wagalela laye uNganani ethi: “Kumbe uthi kawaziwa.” Edingisisa ukuthi kambe waziwa ngani uNgenzile uNganani waliphosa elicijileyo ethi, “Uthi akwaziwa owakwenza kuMkhahlela!”
Kwasekugcwalisekile ukuthi okulempondo akufihlwa emgodleni. Siyakhumbula ukuthi uMkhahlela wayequthelwe ngabantu okwakungaziwa ukuthi ngobani. Kwakuyisiga sakuqala esenzakala eHadlana sethusa abantu abanengi.
UNganani ukubeka sobala ukuthi uNgenzile wayelesandla kulokho okwenzakala kuMkhahlela ngoba uNganani esekhulume kanjalo bonke ababelapho bamkhangela uNgenzile okwathi keqe, abaleke kodwa wasindeka.
UNganani wabona ukuthi wayesethukile uNgenzile, wathi kuhle ayicobodise inyoka ngengxenye ingavuka, ilume abantu njalo. Wayaphambili uNganani eveza bonke ububi bukaNgenzile embuza ukuthi uthi akwaziwa ukuthi lomntanabantu wayengwa nguye. Siluzwile ngaphambili udaba lolu lapho uNgenzile ayenga khona umntakaMbengo loMaNgwenya uSilobile ukuthi atshiye umsebenzi wobubalisi ayesebenza kubomesisi babeLungu koBulawayo.
Kwakungaziwa konke lokhu ebantwini kodwa lamhlanje uNganani ukuchaya obala emphakathi okwethusa uNgenzile obezenza iqhalaqhala.
Kwamehlula uNgenzile lokho waphuma wayacatsha kodwa walilandelisa uNganani ethi kuNgenzile: “Uzambona wena uMaNgwenya! Uzazibophela kuwe.” Yayisiwuchithile umuthi inkonyane. Kwasekusobala ukuthi umuntu owayeze lobugelekeqe bokuquthelwa kwabantu emnyameni lokuyenga abantwana babantu kwakungumntaka
Ndlaleni uNgenzile. Uyakuveza umlobi ukuthi icina njalo imidlalo enjengayenalo owawuseMbijana abantu ababegida baze bezikhohlwe.
Waphetha ngengxabano umdlalo lo owawuseMbijana sebebhongelana sazinja uNgenzile loNganani. Sekuphelile omunye lomunye wadobha ezakhe wakhumbula lapho ahlala khona. LoNdakha owayetshaya isiginci waba ngomunye walabo abahambela phezulu besesaba ukuthi kungathiwa ngomunye walabo abavuse umsindo ikakhulu yena ngekatali yakhe. Lanxa esendleleni lomnakwabo uNkambi kwala kuNdakha ukuthi athule engakhulumi ngoNgenzile.
Wezwakala ethi uNdakha, “Umlungisile uNganani.” UNkambi wabuza ukuthi kambe engabe wayesitsho uNgenzile na? Kawuphendulanga lowombuzo uNganani kodwa waqhubeka ethi kambe kulenkazana engazenza umfana?
UNkambi wavuleka ngokuthi “ugwabisa ubudolobho”. UNganani wasonga ethi buzamphelela lapho eHadlana.
Kwavela-ke okwakwenzakale kuMkhahlela. Bonke abantu beHadlana bakuzwa ukuthi uMkhahlela watshaywa ngabafana.
Kwezwakala futhi ukuthi abafana labo banyamalala kokuphela. Kwathiwa kusisa babonakala eMbabule banamathela ezikaRitshadi, bacatsha edolobheni. Kwezwakala ukuthi babehamba lenkazana. Kwathiwa yiyo ekwaziyo okwaphose kwafelwa nguMkhahlela. Inkazana leyo kuyacaca ukuthi kwakunguNgenzile. Esikudingayo-ke yikuthi uNgenzile wayembangisani uMkhahlela aze amdingele abantu ukuthi bamtshaye bamtshiye ebangwa lezibi?
