uMthunywa
MTHWAKAZI omuhle njengoba lisazi ukuthi iphephandaba likazulu kalideli ukujabulisa umphakathi, kule iviki lize lazo njalo nanku phela liphethe indoda mdabuko umculi we House Music ongena kuvungame uzulu wonke, kunyakaze ngitsho lentwala enweleni.
Kambe kungaba yiliphi ijaha leli elipheka ukudla kwendlebe kanye lokwamehlo ngaphandle kukaMthokozisi Ncube obizwa ngokuthi nguMfundisi Masofa umculo ongaphansi kwe Bulawayo Knits. Kayiculi nje lindoda yinyoni yezulu. Ofisa ukujabula kule iviki nansi ingxoxo enambithekayo phakathi komculi lo uMthokozisi Ncube (MN) lentatheli yephephandaba likazulu uCornelius Luphahla (CL).
CL: Jahelibanzi akuchazele uzulu mayelana lembali yakho kanye leyomculo wakho?
MN: Mina ngazalwa mhla ka 2 Mpandula ngomnyaka ka 1986 esibhedlela seMpilo edolobheni lako Bulawayo.
Kwathi ngo 1992 ngayangena ugiredi 1 eKensington Primary School ngaze ngayaphuma ngo 1997 lapho engayafunda khona eKhumalo Primary School ngayaqeda ugiredi 7 ngo 1998. Ngemva kwalokho ngayafunda ufomu 1 eBulawayo Adventist High School ngo 1999 ngaze ngayaqeda ufomu 6 ngo 2005.
Ngaqhubekele phambili ngezifundo zami ngayafunda iDiploma in Human Resource Management eInstitute of Personnel Management ngo 2008 ngaliqeda ngo 2009.
Ezokucula ngaqala ngo 2006 lapho engangicula khona I kwaito music ngingakaguqukeli ku house music. Noma nje ngangicula ngethuba ngisafunda kodwa ngangikaziwa ngoba ngangingakakhiphi ingoma zami.
CL: Tshela ibandla Mfundisi ukuthi lokhe waqala ukucula sowakhipha amadlalade amangaki njalo wandise ukutshayela ngaphi ingoma zakho?
MN: Lokhe ngaqala ukucula sengakhipha ingoma ezinengi kakhulu noma nje inengi lazo ngangizikhipha kuma single. Ukukhipha ingoma zami lezi ngaqala ngo 2007 lapho engakhipha khona I single ethi Buhle.
Noma nje ngakhipha ama single amanengi kodwa ngo 2015 ngikhiphe idlalade lomhlaba elithi Bulawayo Knits Presents okuyilo elilengoma engizibiza ngayo ethi, “Mfundisi Masofa”. Leli ke yilo engilokhe ngilihazela ibandla njengoba ngilikhiphe ekupheleni komnyaka.
CL: Akutsho mfoka Sikhwili, abantu bathini ngomculo wakho njalo ukhangelele ukubenzelani lonyaka?
MN: Abantu bayawujabulela kakhulu umculo wami njalo bawamukela ngendlela ephakemeyo yikho nje bengimema endaweni ezehlukeneyo bethi babengazi ukuthi koBulawayo lakho kuyatholakala abaculi abacula njengami.
Ngalokhu ke lonyaka ngikhangelele ukujabulisa uzulu ngokumkhiphela amanye ama single amabili ngibuye njalo ngivakatshele indawo ezehlukeneyo lapho engimenywe khona lalapho abangangazi khona ukuze labo babengazi.
CL: Tshela uzulu jahelidala ukuthi ingoma zakho wandisele ukuziculela ngaphi njalo sowathola sicoco bani lokhe waqala ukucula?
MN: Ingoma zami ngandise ukuzitshayela kuma shows endaweni ezehlukeneyo ezilapha koBulawayo kanye langaphandle kwakoBulawayo. Kwesinye isikhathi ngandise ukumenywa emikhosini etshiyeneyo egoqela imitshado, amadili okuzalwa kanye leminye imikhosi etshiyeneyo edinga ukujabulisa abantu.
Ngokunjalo lokhe ngaqala ukucula kangikaze ngithole isicoco ngesizatho sokuthi umculo lo engiwuculayo ubungakabikhona lapha koMthwakazi ngakho ufike kumnyaka ophelileyo yikho nje bekungakabi lezicoco eziphiwa abaculi bawo. Ngakho khathesi ngilethemba lokuthi ngizasithola ngoba umsebenzi engiwenzayo muhle kakhulu.
CL: Ngaphandle kokucula Mfundisi, msebenzi bani owenzayo empilweni?
MN: Ubunzima engihlangana labo njengomculi yikuthi kuleli akulama Distributing Companies angasakaza umculo wethu ngakho kusuka kubenzima ukuthi umculo wethu ufike masinya endaweni ezihlukeneyo. Lokhu kudala ukuthi singatholi abantu abasisekelayo njengoba inengi labantu liyabe lingawazi umculo wethu.
Okunye njalo uhlupho esilalo yikuthi abantu bayasintshontshela umculo wethu bawuthengise ngentengo ephansi okudala ukuthi nxa sesiwuthengisa abantu bengawuthengi ngoba sebejwayele otshiphileyo.
Ngalokhu ke kubaculi abasacathula ngithi kababambelele emculweni bengadeli noma kunzima njalo kabacule ngendlela ethandwa ngabantu ukuze bathuthuke.
