uMthunywa
Charles Dube
KUVIKI ephelileyo sitshiye uBantwini esefikile koBulawyo lapha ayebuye khona loNgenzile kuyikuhambelana kwezinto nje kungasikho babefisa kube njalo. Sibonile ebhasini betshengisa ukungezwani ngoba benela ukuhlanganisa amehlo bazigoqa bobabili. Kabathembani uBantwini loNgenzile ngoba omunye lomunye ucabangela omunye okubi.
Sizwile ukuthi uNgenzile wayezwile ukuthi uBantwini uyamsongela yikho laye wahle wahlala eqaphele. UNgenzile wathi enhliziyweni yakhe kaboke azame uBantwini, kodwa abokuthi esiza kuye, uMaNgwenya alandele lesixaxa, nxa bengathandi ukuthi amathumbu kaBantwini adliwe ngamakhanka okutsho ukuthi wayethembisa ukumgwaza.
UBantwini laye esehlangane loNgenzile ebhasini wacabanga ukuthi uNgenzile wayezwile ukuthi uyahamba ngalelo langa, wathi kuhle laye akhwele ibhasi ayemxusela abafana bakoBulawayo ukuthi bamcitshe.
Esefikile-ke koBulawayo wathi kasoze ayendawo kusihlwa, ngoba uNgenzile wayengamenza. Lokhu kuveza ukungathembani phakathi kukaNgenzile loBantwini bona bevela kusigaba sinye. Konke lokhu kubangelwa yizenzo ezimbi zikaNgenzile owayebalekise udadewabo kaBantwini uSilobile. UBantwini walalela ilizwi likanina ngoba ngalobo busuku bezavuka behamba eNyathi kayanga kudadewabo uSilobile njengokutsho kukanina.
Kodwa wethuka uBantwini nxa basebethe wathalala phakathi kwebhasi sebelungele ukuya esikolo lapho ezwa esebizwa ngumkhokheli webhasi emtshela ukuthi kwakulomuntu omdingayo phandle kwebhasi.
Wayengasamthakazeleli udadewabo uSilobile uBantwini. Kuthiwa wakuzwa ayengathandi ukukuzwa uBantwini ngoba umuntu lowo omdingayo ethe ngudadewabo. Kwathi kalandule athi yena kaladadewabo; kodwa wazi ukuthi abanakwabo babekwazi ukuthi wayezwana okunganani laye uSilobile. Wazi lokuthi abafana beHadlana, labeSibale, labeKhezi, labeDonkwedonkwe babekwazi ukuthi uSilobile wayeze lapha edolobheni esuke engamvalelisanga umfundisi. Pho wayengathi kaladadewabo akholwe ngubani. Wayangeka kuphela!
Waqondana lobunzima uBantwini. Wazibuza ukuthi kambe wayenakanani uSilobile yena ekwazi mhlophe ukuthi wafulathela abantu ekhaya? Uthi yena uBantwini engakhulumani laye? Abazali babo bangezwa ukuthi ubehlangabezwe nguSilobile babezakuthi ngumntwana onjani? Kanti oSilobile benzelani ukufisa ukuvoxa abanye odakeni lwabo? Nxa umuntu ekhethe ubuqholo kungcono aqholoze yedwa; anganindi abanye ubuqholo bakhe.
NguBantwini lo ofikelwa yimbuzo le nxa esizwa ukuthi udadewabo owaxhwalayo uSilobile uyamdinga emabhasini. Ulakho ukwehlukanisa ubuhle lobubi uBantwini nanku phela uyawuqakathekisa umlayo kanina mayelana ngoSilobile. Uthi nxa uSilobile embingelela yena ophendula okomuntu ogulayo. Wabona laye uSilobile ukuthi uBantwini wayengamthakazeleli. Wakwazi uSilobile ukuthi kwakubangelwa yini lokho.
Wayifunda ivaliwe uSilobile ukuthi umnawakhe uBantwini wayelandela imfundiso kanina yokuthi laye amenyanye uSilobile. Lokudla uSilobile ayemphathele khona uBantwini wakwemukela njengento ayenyanyayo. Babona abanye abafana ukuthi uBantwini kakwemukeli ngenhliziyo yonke ukudla kukadadewabo. Abaziyo kabaze bamangala. Abazivelela kwezinye indawo bakhamisa imilomo yangaphakathi. USilobile yena kuthiwa wadonsa umsila, wancifa umkhula wakhe uNgenzile.
Inzondano inkulu phakathi kukaBantwini loNgenzile ngoba sizwa ukuthi wakwenyanya kakhulu ukudla lokhu uBantwini nxa enakana ukuthi kakuke kwabanjwa nguNgenzile. Iyozala nkomoni? Qhubeka lathi kulamakhasi ukuze uzwe ukujuluka kwaloludaba.
