uMthunywa
Ophezulu Stinta
SIKHANGELA indatshana elesihloko esithi UMzabalazo. Sihlangana lomlingiswa okuthiwa nguSizwe, okhanya ephakathi kobuhlungu lapho ecabanga ngosuku oluthile olwesihlanu angasoze alulibale. Yilolo suku olwadala ukuthi inhliziyo yakhe igcwalelane ngenzondo embi.
Kulowomcabango kufika umfanekiso womfowabo uMzamo. Babezwana kakhulu lomfowabo lo wayembona emile phambi kwakhe edlalidlalisa ibhola, emkhabela bagegedeke ke lapho esembalisela langemfihlo yakhe yokudla kakhulu. Yiyona indlela ababesomisana ngayo angasoze ayilibala, lapho ecabanga insuku zenjabulo ayesiba layo elomfowabo, zehla inyembezi kukhona ayesecabange ukukwenza njalo lokho wayezakwenza ekwenzela umnewabo uMzamo. Kwakusobala wayezimisele ukwenza into enkulu nangu esezibona ehamba ethungatha indawo efanelekile, aze abone labantu bemangala.
Wayeseze ecabanga lokulwisana okwakubekhona phakathi kwabo lamapholisa ngesonto eledluleyo abangane bakhe ayehamba labo badutshulwa bafa, yena wasinda ngenhlanhla. Yizehlakalo ezazihlasimulisa umzimba.
Wafelwa ngabafowabo wafelwa ngabazali. Konke lokhu kwakudala ubuhlungu obabumfunqa ukuthi loba sekutheni ngeke abuyele emuva ngesinqumo sakhe.
Usizwe ufikelwa njalo ngumfanekiso wemini ngalelo langa wayengahambanga esikolweni ngenxa yokuthi wayephethwe ngumkhuhlane woqhuqho. UMzamo wezakuye wamvalelisa njengenjayelo. Kwathi ke phakathi kwemini bezwa ilizwi lokuthi kwakube lomsindo omkhulu esikolo kwakuvele kwejayekile ke lokhu kwakungabethusi ikakhulu nxa kulokukhonona phakathi kwabafundi.
Latshona elikamdali uSizwe elokhu elinde umfowabo ukuthi bazodlala ibhola njengenjayelo njengoba loqhuqho lwaselwehlile. Kesenjalo kwathutsha uSabelo ekhefuzela kucaca ukuthi inkulu indaba ayeze ngayo. Kazange akhulume okunengi kodwa wabuza abadala. USizwe wamlayela ukuthi unina ungasemkulwini, lapho usabelo agijima eqonda khona ngesimnyama. Ekufikeni kwakhe lapha wehluleka ukuchaza ngamazwi kodwa ke konke kwasekubakiswa zinyembezi. Unina kaSizwe wayesemangele engasakwazi lokuthi abambe kuphi. Waze wavuleka usabelo ngelithi uMzamo wayelimele esikolo. Lelo lahlaba laquma kuSizwe watsho ukuthi kwakulomsindo esikolo kwasekubizwa amapholisa acina esedubula kwaba yikulimala kuka Mzamo.
Ngalelo langa kulapho azimisela khona ukuphindisela impilo yomfowabo. waqala ukuhambela imihlangano yezombangazwe lapho impilo wayeseyibona ngelinye ilihlo. Waxhumana loBongani lapho abavumelana khona ukuthi beqe umgcele welizwe. Ngesikhatshana benelisa ukuxhumana labanye ababezabasiza. Wafulathela kanjalo umuzi wakwabo. Kwenzeka konke lokhu nje wayeleminyaka elitshumi lasikhombisa. Wahamba iminyaka emihlanu wayengasazi lokuthi ekuphendukeni kwakhe ukhona yini owayengamqamba ukuthi ngubani.
