uMthunywa
SILOKHU siqhubeka ngemidlalo yabasakhulayo kuzigaba ezitshiyeneyo. Ngayo imidlalo le sinanzelela ukuthi izolo bekuphilwa ngayiphi indlela. Okunye njalo esikunanzelelayo yikuthi imidlalo yakhona ibitshiyana ngezindawo.
Imidlalo besekweluseni
Ekweluseni lapha kwakuhlangane amantombazana labafana loba nje ukwelusa kwakungumsebenzi wabafana, imizi engalabo abafana kwakuselusa amankazana
(i) Ukubhukutsha — ukubhukutsha lokhu kulamabizo amanengi,
(a) ukutshaya ibhamu, lokhu yikubhukutsha umuntu etshaya amanzi ngenyayo,
(b)ukuntsheza, lokhu yikuhamba emanzini ngesisu kodwa ungatshonanga njalo ungatshayi ibhamu,
(c) ukundenda emanzini, ukucwila, lokhu yikutshona emanzini uhambe ngaphansi kwamanzi uze uyevumbuluka usungale.
(d) ingege lokhu yikubhukutsha umuntu eqethukile, elele ngomhlane phezu kwamanzi.
(ii) Ukubhaqa insema lapha kugejwa isihlahlakazana esilejodo. Isihlahlakazana lesi yiso okuthiwa yinsema. Abafana badinga imiqwayi emidanyazane bayicije kwelinye icele. Abafana ke bayema baphahle umgwaqo omunye abe esedinga ijodo lelo elensema ligijime phakathi kwabo. Nxa lidlula phakathi kwabo yiso isikhotho okumele baligwaze ijodo lelo. Injongo yomdlalo yikuthi ingcitshi yokugwaza ngubani.
(iii) Inqindi lapha ke abafana babethuzana ukuze kubonakale ukuthi ngubani okwaziyo ukuthuza. Injongo yikuthi umuntu avike angavuli inqindi ingene imtshaye emehlweni kumbe esiswini loba emlonyeni.
