uMthunywa
KUQAKATHEKILE ukwazi ulimi oluqondileyo ukuze siluthuthukise.Ngelinye ilanga lani bafundi lizabe selingabazali sokumele lifundise abenu abantwana ulimi oluqondileyo kungakho-ke kuqakathekile ukuthi likhuthale ekufundeni lekujuliseni ulwazi lwenu lolimi lweSiNdebele. Nanzi impendulo zomsebenzi weviki ephelileyo.
1. Amanzi agcwele phamu edamu.
2. Kanti Sipho udle watshiya imiganu ithe hlikilili uthi izabuthwa ngubani?
3. Izigebenga zamtshaya zamtshiya ethe tasa.
4. Udokotela wathi kungani ungalethanga umntwana lo esibhedlela izilonda zakhe sezi phihlike kanje.
5. Ungazondisa umuntu kuhle ukuthi ucele uxolo khona ezakuxolela.
6. Imbuzi idle indumba zikamama zaphela du.
7. Uthe elibele wabona thutshu umzawakhe
8. Ingcitshi kwezemithi zithwele gadalala zidinga indlela ezinganqoba ngayo i-AIDS.
Umsebenzi wakule iviki nanku.
Ukubala indaba
Kufanele indaba liyibale kancane kancane ukuze liyizwisise njalo ukuze lokhu kwenzakale, kumele indaba liyibale kabili kusiya kukathathu. Kulabanye benu abangalandeli izixwayiso bethi lapho bengayibala kanye bafune ukuphendula imibuzo bacine benika impendulo ezingaqondanga. Ukugijima kayisikho kufika bafundi ngakho umuntu munye ngamunye kufanele azinike isikhathi esaneleyo sokuthi abale indaba yakhe ayizwisise. Nxa lapho libala indaba okwesibili, kufanele libe selike lakhangela imibuzo ebuziweyo. Lokhu kuyanceda ukuthi lazi lapho elizathola khona impendulo zenu.
Nxa lingakhangela umbuzo u (f), udinga ukuthi litsho ukuthi amabala asetshenziswe endabeni atshoni. Lapho libala, lingahle liwadwebe ngosiba ukuze lingathathi isikhathi eside liwadinga lapho asetshenziswe khona.
Ukuphendula imibuzo
Imibuzo yonke kufanele iphendulwe ngokugcweleyo. Okunye njalo okuqakathekileyo kakhulu yikuthi imibuzo kufanele iphendulwe njengokusetshenziswa kwayo endabeni. Lingalobi impendulo elizifunayo lina ngoba lokhu kuyabe kungaqondanga.
Ngilifisela inhlanhla ezifundweni zenu njalo liqhubeke lisebenza nzima. Lisale.
