uMthunywa
Yintatheli kaMthhunywa
BABEQINISILE ABADALA ukuthi okulempondo akufihlwa emgodleni zimbi ndaba eSinangeni nanko sokuze kwavela egcekeni into yamehlo kulandela ukubhuqana kwamadoda amabili ebanga umazakhela okuyinto elihlazo izakhamizi ezilokhe zinathisana itiye ngodaba lwakhona iphephandaba likazulu likuveza ngokugcweleyo lokhu namhlanje.
Kusiga esenzakale kuviki eliphelileyo eZhombe esigabeni sase Sinangeni ngaphansi kwenduna uNtabeni uSobhuku uSitshonile kubikwa ukuthi izakhamizi zibukele ibhayisikophu yamahala zidibene indala zombili uSimba Bhango lo Mthulisi Noel Mpala bebanga umazakhela uSoli Shamhu Mpofu okuze kwalamula ukuqamuka kwenduku lapho bebanga ingwane eyayiqokwe ngomunyewamadoda lawo laye eyithethe kuleso salukazi esixwalileyo esibatshayanisa amakhanda.
UMthunywa uxhumane lo Mcedisi Ndlovu oyisakhamuzi sakuleyo ndawo yena obike ukuthi wayekhona kusenzakala leyo mihlolo njalo imbangela yokubhuqana yingwane kaMpala ayitshiyela uNkosikazi Mpofu wayithola isisekhanda lika Bhango okuhle kwenza bedumelane langamazinyo .
“Ngethuswa yikukhangelana kwabo ngahle ngabona ukuthi iwuchithile umuthi inkonyane. Sazama ukulamula kodwa sesaba ukulimala njengoba babesebenzisa imiqwayi lenduku ekulweni kwabo. Ukuqamuka kwenduku kwenza bekelana omunye waqonda le omunye laye waqonda kweyakhe indlela”, kutsho uMnu Ndlovu.
UMthunywa uxhumane njalo lo munye wabomsolwa yena obike ukuthi ucaphuke kakhulu ngoba engathandi ukudelelwa lokweyiswa ngeyinye indoda ikakhulu kumuntu ongowesintwana athandana laye kafuni kuphanjaniswa.
UMthunywa uxhumane njalo lomele uSobhuku uGodwin uNyathi njengoba usobhuku esemazweni yena obike ukuthi udaba lwafika endlebeni zakhe kusalungiswa ukuthi bahlawuliswe edale ngoba bedelela isigaba ngesenzo sabo leso.
“Mina ngisola uSiboniso Bhango umama ka Simba nguye ofuna ukuhlawuliswa enkundleni ngoba wehluleka ukukhuza umntanakhe ukuthi aphume ayedinga umfazi kulokutshona ezula zula ekhaya nanko sethandana lesalukazi esindala kulonina njaloseze walwa leyinye indoda elingana loyise ebanga leso salukazi.Sixwayisa izakhamuzi ukuthi zikhuzane zingayangisi isigaba kutsho uMnu Nyathi.
