uMthunywa
Cornelius Luphahla
UPHAKATHI kwezinyembezi umdeni wakoDube esigabeni seWulube eLupane ngemva kokuba ubaba walo umuzi eganyulwe yimamba ikhanda egebha umayelane eloyisezala wafa.
Isiga lesi senzakale ngoLwesibili kuviki ephelileyo lapho uMnumzana Simon Dube alunywe khona yinkalakatha yemamba egebha umayelane eloyisezala uMnumzana Travor Nkomo wafela endleleni ngethuba esesiwa esibhedlela se St Luke’s, uMthunywa uyakuveza lokhu.
Kuzwakale ukuthi uMnu Dube usuke ekuseni loyisezala besiyagebha umayelane njengensukwini bathi sebebambe omayelane ababili sebegebha owesithathu uDube wathi egebha kwaphuma inyoka emlindini yamtshaya ikhanda wahle wawela phansi.
UMthunywa ukhulumisane loyisezala kaDube uMnu Nkomo wachaza ukuthi kalankani ngale indaba njalo inyoka le kukhanya ubeyigwaze ngengwegwe abamba ngayo omayelane.
“Kangilamathe ngesiga lesi esingehleleyo esokulunywa komkhwenyana wami yinyoka. Inyoka le kukhanya ngayigwaza ngengwegwe yami engiyisebenzisa ukugwegwa ngayo omayelane. Manje mina kangizange ngakunanzelela ukuthi ngigwegwe inyoka njengoba yayisemlindini ngazitshela ukuthi ngigwegwe umayelane.
“Kwathi ngesikhathi umkhwenyana esegebha maqondana lalapho okwakulenyoka le khona kasazange wayibona yahle yamgamula ekhanda. Mina njengoba ngangibambe isigodo sengwegwe le kangizange ngabona lutho ngwezwa kuphela ememeza ethi uselunywe yinyoka wahle wawela phansi. Ngagijima ngamthwalela ekhaya wabhubhela endleleni sesimusa esibhedlela,” kutsho uMnu Nkomo.
UNkosazana Silethemba Dube udadewabo kaMnu Dube ubikele intatheli ukuthi indaba le imqeda amandla njalo inyoka le kukhanya ngeyomuntu ngoba ike yabonakala emzini kaDube ingakamlumi.
“Inyoka le ingiqeda amandla njalo kusobala ukuthi ngeyomuntu ngoba ike yabonakala ngoMvulo embhedeni kamnewethu. Isimanga yikuthi sithe sizama ukuyitshaya yabaleka yaqonda ekuyeni lapho umnewethu alunyelwa khona. Lokhu kuveza sobala ukuthi ngeyomuntu sibili ngoba abantu balapha vele bagangile.
“Okubuhlungu yikuthi inyoka le sehlulekile njalo ukuyibulala ngoba sithole isiphumile emlindini lo yahamba,” kutsho uNkzn Dube.
Usobhuku wakule indawo uMnumzana Danisa Ndlovu ebuzwa ngale indaba uvumile ukuthi uyayazi wathi indawo yakhe le ilenyoka ezesabekayo.
“Kuliqiniso sibili ukuthi uDube ubulewe yinyoka njalo indawo le esihlala kuyo imbi kakhulu ngoba ilenyoka ezesabekayo. Ngalokhu ke ngikhuthaza abantu ukuthi bahlale beqaphele ukuze bengehlelwa zingozi ezifana lale esikhuluma ngayo,” kuphetha uNdlovu.
