uMthunywa
IMPILO yokujabulisa abanye abantu ibuhlungu kakhulu ngoba ayehlukananga lakancane lobugqili. Kulusizi ukuthi kulabantu abehluleka ukwamukela isimo sabo kumbe sithi indlela uMdali abadala ngayo okokuthi bakhetha ukuguqula indlela ababukeka ngayo. Abanye kungenxa yokuthi bafuna nje ukuthokozisa abanye abantu, umuntu aze azitshintshe indlela ayiyo ngoba ezama ukuthi athokozise kumbe amukeleke kwabanye abantu.
Abanye ngabathenga amaphilisi kumbe abahlatshwa amajekiseni okubumba ifiga. Abanye bazitshintsha ijwabu babemhlophe sangathi ngabelungu. Kuthi abanye labo balungisise amakhala, indebe zomlomo kumbe indlebe ngokuhlinzwa. Konke lokhu kungenxa yokuba bafuna ukukhangeleka ngenye indlela ngaphandle kwale abadalwa babayiyo. Okudanisayo yikuthi kuzozonke izizatho zokusebenzisa amaphilisi la abazinikezileyo, esimqoka kuzo bekuyikukhanga lokujabulisa amadoda.
Kulusizi ukuthi abantu besintwana bazithola sebegqilaziswa yikuthanda ukubonakala, abantu baze bacine besenza ezinye izinto ezibeka impilo zabo engozini nanko phela amaphilisi la abawanathayo alama-side effects abalisela ukutshaywa likhanda kanye lesiyezi. Amanye akhona kubikwa alakho ukukhulisa isibunu esisodwa ukwedlula esinye. Pho leyo figa eyabe idingwa iyabe isakhangelwa ngubani nxa umzimba ungasabumbekanga ngendlela?
Okunye okuzwisa usizi yikuthi amanye alawo maphilisi abawanathayo awafanelanga ukunathwa ngabantu njengoba kuthiwa enzelwa amabhiza. Kambe ingaphakathi yomuntu leyebhiza ziyahambelana? Nxa umuntu esegula usebiza amaloyo yena kunguye oziloyayo ngokuthanda izinto.
Kwesinye isikhathi abantu bayazilimaza ngenxa yokuthathwa ludumo lwezinto abangela qiniso lazo.
Ezinye zezizatho ezenza omama laba bafune ukuziguqula yikunakanela ukuthi amadoda e-Africa inengi lawo awathandi omama abangocigo abangelazo izibambo kumbe sithi amacurves endaweni ezithize emizimbeni yabo.
Lanxa kunjalo kuqakathekile ukuthi abantu balandele indlela ezisemthethweni zokwakha umzimba lokubumba lawo mafiga abawathandayo ukuze lanxa kungenzeka ukuthi kuphambaniseke okunye benelise ukuthola usizo.
Kuqakathekile njalo ukuthi abantu baphile impilo zabo hatshi ukufuna ukuba ngabanye abantu ngoba inengi labesintwana kulezinsuku lifuna ukuba njengabosaziwayo laba abaphuma kumabonakude. Abanye bafuna ukuba njengabo okokuthi umuntu uvele ephulele izigodo endlebeni angabesezwa lanxa eboniswa ngengozi ezingamphambanisela impilakahle yakhe.
Lokhu kuzitshintsha kwabesifazana kuyisibonelo esibi ebantwaneni abasakhulayo ngoba nxa bebona onina besenza lokho ngeke bekele ukulandela ngoba becabanga ukuthi kuyinto eqondileyo.
Kungumbono kaMthunywa ukuthi labo abafuna ukwakha imizimba yabo benze njalo ngendlela ezisemthethweni ukuze bangafaki impilo zabo engozini.
Amapholisa lawo angaba lusizo kakhulu nxa engahlasela abophe bonke abathengisa imithi le engekho emthethweni ngoba befaka impilo zabantu engozini.
Phezu kwakho konke kuqakathekile ukuthi abantu basuthiseke ngendlela abadalwe baba yiyo ukuze bangacini bezilimaza, bacine sebeyinhlekisa bona bedinga ukubonakala.
