uMthunywa
NguMsilisi Dube
UMPHATHINTAMBO okhangele ngezokulima uKhomuredi Joseph Made usekhuthaze abalimi bezigaba zonke zelizwe ukuba baqalise ukudingela izifuyo zabo ukudla ukwenzela ukuba zingacubi ngesikhathi sendlala.Ekhuluma ePhalamende ngoLwesine kuviki edluleyo, uKhmrd Made uthe kubalulekile ukuba abalimi basike utshani bungakawomi ukuze izifuyo zabo zithole amandla zingabudla.
“Abalimi abahlakaniphileyo kumele baqalise ukusika utshani ukuze izifuyo zabo zibudle ngesikhathi sendlala.
Lonyaka izulu kalinanga kuhle elizweni ngakho abalimi abakhaliphileyo baqalisa khathesi ukudingela izifuyo zabo ukudla.
“Ngokuya kwesikhathi ukudla kwezifuyo kuyabe sekudula ezitolo kungakho balakho ukukwenqabela lokhu ngokuhle bazidingele ukudla khathesi kuseselentengo ephansi,” kuchaza uKhmrd Made.
UKhmrd Made ubuye wathi abalimi kumele baqalise ukuthengisa izifuyo zabo ezindala ukwenzela ukuba zingabulawa yindlala.
“Abalimi bavame ukuphuza ukuthengisa izifuyo zabo zicine sezicuba kakhulu. Akulamthengi ofuna ukuthenga inkomo ezicakileyo njalo ezigugileyo. Abalimi kumele bahle baqalise khathesi ukuthengisa inkomo zabo ezindala ukwenzela ukuba zingacini zithengwa ngentengo ephansi.
“Abalimi abavame ukuthwala amagabha avuzayo ngabavelela emhlubulweni weMatabeleland ngoba kulapho izifuyo zabo ezivame ukukhotha khona inhlabathi ngenxa yokuswelakala kwamanzi,” kuphetha uKhmrd Made.
UDokotela Pollex Moyo okhangele isigaba seMangwe uthe abalimi kumele basike utshani obuvuthiweyo ukwenzela ukuba bungagulisi izifuyo zabo.
“Utshani obuluhlaza buyagulisa izifuyo ngakho abalimi kabasike utshani obuvuthiweyo ukwenzela ukuba izifuyo zabo zingacaki. Utshani kumele busikwe khathesi bungakomi kakhulu ngoba bungoma buyaphela ukudla konke,” kuchaza uDkt Moyo.
