uMthunywa
Pumulani Mpofu
EKUKHULENI kwami ngangihlala ngisizwa ukubana ilifa lezithutha lidliwa ngabahlakaniphileyo kodwa ngaleso sikhathi ngangingaqondisisi ukubana kutshiwoni. Ekukhuleni kwami njalo lokusebenzeni kwami ngaqala ke ukunanzelela ukubana lesisaga siliqiniso njalo siveza sobala ukubana izaga zabadala zilezitsho njalo zathathelwa kuzehlalakalo zempilo esizibona mihla ngemihla . Inengi labantu selabangamavila okubana bazisebenzele bathole inotho evela kuzithukuthuku zabo kodwa sebenqwathela ilifa elisetshenzwe ngabanye njalo basuka bebe lobugovu laloba nje belezabo impahla.
Lokhe ngaqala lumsebenzi eTrinity Project wokweluleka abantu ngendaba zelifa, sihlala sikhuthaza abantu ukubana baqakathekise ukuloba izincwadi zokwaba ilifa njalo bezigcinise enkantolo ngemali engange $1 ukuze kuthi kufika isikhathi sokubana badlule kulo umhlaba ifa labo libe lihlelekile. Incwadi yokwaba ifa inhle kakhulu ngoba kayiphikiseki nxa ilotshwe ngendlela efaneleyo njalo eveza sobala ukubana umlobi wayo ube engaphoqwanga kodwa ulobe ngenhliziyo yakhe yonke njalo ngendlela ehlelekileyo.
Kule iviki ngizathanda ukubana sixoxe kabanzi ngokubana incwadi yokwaba ilifa (will) iyikuyini njalo imumetheni okuyenza ibe yincwadi eqakathekileyo kakhulu. Okwakuqala incwadi yokwaba ilifa yincwadi elotshwa ngumnikazi wempahla esaphila ukubana uthanda ukubana ilifa lakhe labiwe ngayiphi indlela lapho nxa sethe wadlula kulo umhlaba. Ngizapha umzekeliso wokubana nxa ubaba uJabulani Dlodlo elendlu yakhe ayithenga eNkulumane ulelungelo lokubana alobe incwadi yakhe yokwaba ilifa . Ekwabeni ilifa lakhe ulakho ukuloba loba ngubani afisa ukumtshiyela indlu yakhe.
Ekulobeni incwadi yokwaba ilifa kuqakathekile ukubana siqaphele njalo singenzi amaphutha. Nxa uloba incwadi yokwaba ilifa kuqakathekile ukubana ulobe uwedwa njalo umuntu ongabe elesabelo esithile kuleyo ncwadi akumelanga abe ngumfakazi owakho. Lokhu kuba liphutha labanengi njalo kucina kusenza ukubana kukhanye angathi waloba uphoqiwe ngulowo muntu ukuze umuphe isabelo kulifa lakho. Okunye njalo yikubana incwadi yokufa yimfihlo yakho ngakho ke nxa usuthe wayiloba akufanelanga ukubana utshele lowomuntu olesabelo kiyo ukubana sumphile lelo lifa ngoba esengakuphoqelela ukubana uhle umuphe laloba usaphila.
Lapho usuthe wayiloba incwadi yakho yelifa ngobukhulu ubunono kuqakathekile ukubana uyigcinise emthethwandaba omkhulu weZimbabwe (High Court of Zimbabwe) njalo ukhokha imali engange $1 uze uyekufa kungakhethekile ukubana uzakufa ngawuphi umnyaka. Inkantolo ikugcinela kuhle incwadi yakho yelifa njalo laloba kukhona abantu abangafisa ukuthengisa indlu yakho ngokungekho emthethweni kusuka kube nzima ukubana bayintshintshe ibizo ngoba kuzamele baye enkantolo ukuze kuntshintshwe ibizo lendlu.
Ingqobe sengiyitshiya kini mahlabezulu, kasihleleni ikusasa lethu ukuze ilifa lethu labiwe ngendlela efaneleyo njalo ngezifiso zethu.
Kasihlanganeni njalo kuviki elizayo.
Umlobi utholakala kunombolo zocingo ezithi 0773195055 loba kukheli ethi www.trinityproject <http://www.trinityproject> .biz