uMthunywa
UMNYAKA uqalile bangane abantu bonke bamatasatasa badinga imisebenzi. Wonke umuntu odinga umsebenzi ulethemba lokuthi njengoba kunguZibandlela kunje ama-chance okuthi aqatshwe abanzi kakhulu.
Abanye bavela baqala ukuvukela emahofisini lasemafemu kusukela nje mhla ikhefu lomnyaka omutsha lisedlula.
Phakathi kweviki ngike ngavakatshela ezinye indawo lapho okubuthana khona abantu abalindele ukuqatshwa. Hayi-ke bangane ukutshelwa yikuncitshwa, engikubone lapho, ngisele ngingelankani.
Ngiqale kwelinye i-corner okuthiwa kukoPots ‘n’ Pans lapho okubuthana khona labo abafuna umsebenzi wokuba ngo-house technician kanye labo-landscape technician, ngitsho bona phela abasisiza ezindlini kanye lasezivandeni.
Ngithe ngisamangaliswe linani labantu engibathole lapho thutshu uvava lwemota itshayelwa ngowesintwana osakhulayo njengathi.
Mamo, engikubone lapho abantu baphonguthi kwatshu kanye, abanye lokuthi bavumbuluke ngaphi angibabonganga, bayakuthi mbo kuleyo mota.
Asikufuqana okuncane engikubone lapho abantu bebangisana ukubaphambili kuthiwa mhlawumbe umuntu angaba lenhlanhla laye abonwe “ngumesisi lo.”
Ngenxa yevigoroni ekade isilapho, untombazana wabantu umane wehlisa iwindi lemota yakhe watsho angemangaki nje. Khonokho nje ngabona abantu bebuna, abanye bahle bayazichaya ngaphansi kwemithunzi.
Njengomuntu othanda ukwazi mina kuhle kwangikhathaza ukuthi nga lodade etheni ebantwini ngasengibuza omunye ubhudi okade elapho, yena ongitshele ukuthi udade lo uthe udinga umuntu wokuncedisa endlini kodwa ufuna umuntu olesithupha sikaForm 4.
Ngemva kokutsho lokho ke udade lo ume wama waze wazisukela kungela ngitsho yena osafuna ukusondela phansi kwemota yakhe, sengitsho khona ukuyikhangela. Kimi kuhle kwavela mgceke ukuthi isikolo ungaze uzame ukusibalekela njani, uyasithola sithe kho sikulindele lapho ofuna ukucatsha khona.
Ngihle ngaziphendukela ke lesithuli sami, ngasengisithi kahle ngidlule ngilunguza koVundu. Lalapho-ke ngifice kungasi muntu.
Bekulamankampani uqobo kanye lengatsha zikaHulumende akade zizoqhatsha. KoVundu ke bekugxotshwana kungancengwana. Engikubone koPots ‘n’ Pans bekungumfana.
Bekusithi kungabizelwa umsebenzi, kuvungame kufuqwane lapha kodwa kungavele kukhulunywe ngezithupha ubone khwimilili abantu.
Kungidanisile kakhulu ukubona abantu bakithi besedlulwa ngamathuba omsebenzi ngenxa yendaba yezithupha. Ngenhliziyo ngaphonguthi, “uyabona nxa sisithi abantu abaye esikolo bathi siyambuluza. Manje yini so?”
Ngiyazi izizatho zethu zokuswela lezo zithupha zehlukene kodwa bekukuhle nje ukuthi labo abaphiwe ithuba lokufunda babophe ziqine ukuze bangeqiwa ngamathuba omsebenzi. Sihlangane njalo kuviki ezayo.
