uMthunywa
Silo Charls Dube
Isabizwana siyaqhutshwa
Ukwakhiwa kwesabizwana sokukhomba buqamama
Sakhiwa sisuselwa esabizwaneni sokukhomba eduze, ngezindlela ezilandelayo.
Kuzabizwana zokukhomba ezilunga linye, sijobelela isakhi sesabizwana u “o” bese sifaka osingankamisa ngokufaneleyo phakathi kwesabizwana lesakhi.
Isibonelo: lo + o > lowo; le + o > leyo; la + wo > lawo.
Uma izabizwana zokukhomba eduze zimalunga-mabili, sijobelela u “o” besekuthi unkamisa wesabizwana osekucineni adedele indawo isakhi u “o”.
Isibonelo: leli + o > lelo; lolu + o > lolo; lobu + o > lobo.
Ukwakhiwa kwesabizwana zokukhomba kude
Laso sisuselwa esabizwaneni sokukhomba eduze ngokujobelela u- ya loba u-waya.
Izibonelo: lesi > lesiya; lezi > leziya; lobu > lobuya
Isijobelelo u-waya usetshenziswa ezabizwaneni u lo, lo la.
Isibonelo: lo > lowaya; la > lawaya.
Ukusetshenziswa kwesabizwana sokukhomba
Siyasebenza silandela ibizo emtshweni.
Isibonelo: Intaba leya iyesabeka. Intaba libizo. Leya yisabizwana esikhomba kude esilandela ibizo intaba.
Inkomo lezi ngezikaMoyo. Inkomo libizo. Lezi yisabizwana sokukhomba kude.
Ilitshe lelo lizakulimaza. Ilitshe libizo. Lelo yisabizwana sokukhomba buqamama esilandela ibizo ilitshe.
