Uncategorized

Bakhala ngosobhuku olobugwelegwele

04 Jun, 2015 - 09:06 0 Views

uMthunywa

Msilisi Dube
SEKUQHAMUKE impi phakathi kukasobhuku wesigabeni seMatankeni eNyamandlovu kunye lekhomithi akade esebenza layo esiveze ukuba ubedizisa izakhamizi ukuze zithole indawo zokuhlala endaweni le.

Usobhuku lo uMnumzana Thamsanqa Sikhosana kucatshangelwa ukuba wadizisa abantu abangu-10 wasebanika indawo zokuhlala engazisanga ikhomithi asebenza layo.

Omunye umfakazi waloludaba uMnumzana Lucky Moyo uthe usobhuku lo ugange kazazi ngoba wayehamba koBulawayo ayebuya labantu bakhe abathengisele indawo.

“Indawo le ngeyethu, akumelanga ithengiswe. Esakuzondayo yikuthi wahamba wayabuya labantu abangu-10 wafika wabanika indawo. Thina sala ukuba baphiwe lezo ndawo. Ngemva kwalokhu sabhalela abalisa incwadi ngesenzo sakhe lesi.

“Abalisa bona ke bafika baxotsha ikhomithi yonke bathi izonda usobhuku lo. Abazange baveze isizatho esibambekayo ukuba kungani bexotshiwe. Eqinisweni thina asisamfuni usobhuku lo, kungangcono asuke ahambe,” kulandisa uMnu Moyo.

UMnu Moyo uveze ukuba kulamanye amalunga ekhomithi le abotshiswa enduneni kuthiwa adelele usobhuku lo ngoba esithi uyadizisa.

“Ezinye izakhamizi ezimbili ezibalisa uMnumzana Tshakalisa kunye loMangena babotshiswa enduneni ngoba kuthiwa bavezeleni ukuba usobhuku lo wayethengisa umhlabathi,” kuchaza uMnu Moyo.

UMthunywa udingisise kwelinye ilunga lekhomithi le elaxotshwayo uMnumzana Ones Ngwenya waveza ukuba kuliqiniso ukuba waxotshwa kodwa kanikezwanga isizatho esibambekayo ngokuxotshwa kwakhe.

“Kwathiwa mina lekhomithi yami sekele umsebenzi. Okusimangalisayo yikuthi kasizange sitshelwe isizatho sokuxotshwa kwethu. Ezinye izakhamizi zimangele ngokwenzakalayo ngoba sasisebenza lazo kuhle. Kulamanye amalunga ekhomithi ebesisebenza lawo abotshiswa enduneni.

“Icala labo kuthiwa baphendula kubi usobhuku lo. Bazakuyathonisiswa enduneni ngoLwesihlanu kuyonale iviki. Sithwele amagabha avuzayo ngoba singakhuluma ulutho oluqondileyo kuthiwa kasilunganga,” kuphetha uMnu Ngwenya.

USobhuku lo uMnu Sikhosana uthe kungamanga aluhlaza ukuba udizisa izakhamizi ukuze zithole indawo zokuhlala.

“Angikaze ngidizise umuntu ukuze athole indawo yokuhlala. Ikhomithi ebengisebenza layo yaxotshwa ngoba yabhalela abalisa incwadi ibatshela ukuba mina ngathethisa omunye umhlonitshwa wakuleli. Ekuthonisisweni kwecala leli kwavela ukuba angizange ngithethise muntu ngakho yikho bezathonisiswa enduneni.

“Abantu laba bangibangisa ukuba ngusobhuku. Manje okusalayo yikuthi angiyindawo ngizaphuma mhla ngisifa,”

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds