uMthunywa
YiNtatheli kaMthunywa
IMINCINTISWANO yomdlalo wokugijima eyamazwe kufanele ingaqhutshwa ngasikhathi sinye ukwenzela ukuthi abadlali belungiselele imijaho kungela kuphazamiseka.
Imijaho emikhulu yembuthano ebalisa amaAll-Africa Games leWorld Championships ibakhona ngesikhathi kuleminye imincintiswano, okuyikhona okwenza abagijimayo balungiselele imidlalo nzima.
Umkhokheli wenhlanganiso yeNational Athletics Association of Zimbabwe (Naaz), uTendai Tagara utshele iphephandaba likazulu ukuthi abadlali bakuleli abakaze belethe imendulo ababezikhangelele kumincintiswano yamaAll-Africa Games ngoba imincintiswano le yayidibanisiwe ngesikhathi esifanayo.
Ngo2012 imidlalo yokugijima yeAfrica yenzelwa edolobheni leMaputo, eMozambique kukanti amaWorld Championships aqhutshelwa eDaegu eKorea.
UTagara ubikele uMthunywa kuliviki ukuthi uhlelo lwemincintiswano yezemidlalo kwelakithi ayivumeli ukuthi isizwe sithumele amathimu amabili atshiyeneyo.
Uthe kubalulekile ukuthi kuguqulwe ukuqhutshwa komdlalo wokugijima ukuze kubelula ukuncintisana lamanye amazwe. UTagara uthe labajimayo bazathola ithuba lokuyancintisa kumijaho eminengi.
“Amathimu ethu okugijima ahlala esalele emuva ngenxa yokuthi imincintiswano yaphezulu yandise ukuqhutshwa ngasikhathi sinye. Amazwe amanengi abhekane lodubo olufanayo. Kubanzima ukuthi sikhethe amathimu amabili ngesikhathi esisodwa, kukanti labagijimayo bayacitshelwa ukuthi bakhethe wuphi umncintiswano.
“lkhansili yezemidlalo eyeAfrica yacetshiswa ukuthi inanzelele ukuthi imincintiswano kumele yehlukaniswe. Loba isikhalazo lesi sezwakala, lakhathesi akulatshintsho,” kutsho uTagara.
Amathimu agijimela iZimbabwe aselabadlali abanciyane abasacathula kulumdlalo. UTagara uthe bayathokoza ngokuthi lama-juniors atshisekela ukugijima kubanga eliphezulu.
Ukhulume kabanzi ngethalenta elalikumidlalo yamaYouth Games.
“Akumangalisi ukuthi sekulabasakhulayo abasezikolo asebetshengise ukuzimisela ukugijimela isizwe. Ithalenta ligcwele kuleli ngoba esakubona kumaYouth Games kwasijabulisa. Ikusasa yomdlalo wokugijima ivulekile sibili.
“Ngisuthisekile ngokugijima abakwenzileyo njalo ngikubone kukuhle ukuthi abantwana abanqobayo bathole ithuba lokubukisa amathalenta kwezinye izigaba zomdlalo.”
Ucine ngokuncoma umsebenzi owenziwa nguSamukeliso Moyo, uNkosiyazi Sibanda, uNgonidzashe Makusha labanye.
“Nxa kulabagijimayo abalokhe bephakamisa imisebenzi yeNaaz, kutsho ukuba lalabo abasakhulayo bazatshiyelwa ingqobe yokuqhubekela phambili.”
