uMthunywa
YiNtatheli kaMthunywa
AMALUNGISELELO okhetho lwabameli bedale lePhalamende asekuzinga eliphezulu endaweni ezitshiyeneyo zelizwe njalo labo abazaphatheka kukhetho lwamhlaka 10 Nhlangula bamatasatasa ngokukhankasa endaweni zakibo.
Phakathi kwalezindawo lapho okuzaqhutshwa khona ukhetho kuleTsholotsho North okuyindawo okulabantu abathathu abazavotelwa abathi, uSikhwicamfundo Jonathan Moyo yena onguMphathintambo wogatsha lweMedia, Information and Broadcasting Services njalo emele ibandla leZanu-PF, uNkosazana Getrude Sibanda kanye loMnumzana Busani Ncube abazimeleyo lanxa nje belobudlelwano lamabandla aphikisayo.
Impumela yokhetho lolu izatshintsha ikusasa labantu beTsholotsho kuminyaka emithathu elandelayo.
Iphephandaba likazulu lingene umango weTsholotsho North ngempelaviki lafica kuyimithimba yodwa yokukhankasela uSikhwicamfundo uMoyo phose iTsholotsho yonke.
Amalunga ebandla elibusayo aziqoqe kuhle abelana indawo lapho okuzakhuthazwa izakhamizi zeTsholotsho ukuthi zibone ngaso linye mhla wokhetho ukuze kuvotelwe uSikhwicamfundo.
Ugatsha lwabomama kuZanu-PF, luphume ngozhizhi lusiyakhuthaza abesifazane ukuthi bakhethe ukuvotela iZanu-PF ngoba kuyilo ibandla elibusayo kuHulumende.
Kukhangelelwe ukuthi uSikhwicamfundo uMoyo abuthe amavoti wonke, aphenduke njalo ePhalamende esiyancedisa ukuthuthukisa iTsholotsho.
UMnumzana Themba Ndlovu wakoDhlamini khonale eTsholotsho uthe amaphurojekithi wonke aletha intuthuko esigabeni sabo alethwa nguSikhwicamfundo uMoyo.
“Thina njengezakhamizi umuntu esimbona engalwela intuthuko yethu phakathi kwalabo abafuna ukuvotelwa nguSikhwicamfundo. Laba abazimeleyo kutsho ukuthi bazamela eyabo intuthuko hatshi eyabantu.
“Kunje silezikolo, silamakilinika, safakelwa ama-booster abomakhalekhukhwini, khgathesi sakhelwa inkundla yebhola yabantwabethu asebangena kuligi ephezulu yenguqu kungenxa yakhe uSikhwicamfundo uMoyo, pho siyabe sifunani kulaba abanye,” kutsho uMnu Ndlovu.
Ivoti yomuntu yaziwa iyimfihlo kodwa eTsholotsho inengi labantu lithi kakho omunye ofanele ukuvotelwa kukhetho oluzayo ngaphandle kukaMoyo.
UMthunywa uxoxe lezakhamizi enzikini yeTsholotsho zabika ukuthi akula omunye umuntu ongayiphakamisa ngaphandle kwakhe.
“Uyabona konke okulapha eTsholotsho Business Centre kwalethwa nguMoyo [uSikhwicamfundo]. Bonke esabavotela kuminyaka edluleyo behluleka. Ungakhangelisisa, kwezinye indawo zeTsholotsho bafisa ukuthi uMoyo abamele ePhalamende ngoba bayazi ukuthi usebenzela abantu,” kutsho uMnumzana Japhet Moyo wakoSipepa.
UNkosikazi Emelda Sibutha-Ncube osebenzela eTsholotsho uthe usanda kuthola isitanda somuzi kulindawo njalo usebhalise ibizo lakhe kunhlanganiso yeZimbabwe Electoral Commission.
“Ngimutsha lapha eTsholotsho kodwa uProfessor Moyo ngiyamazi ukuthi nguye olakho ukuphakamisa indawo le. Indawo le ngeyakibo, angeke ayekele isalela emuva.”
Izakhamizi zibika ukuthi kulabanye babo abenza iphutha ngokuphosela uNkosikazi Roselyne Nkomo kukhetho luka2013.
UNkkz Nkomo kuthiwa wehluleka ukwenza okukhanyayo empilweni zabantu beTsholotsho.
“Ukungazi kufana lokufa. Okwenziwa ngo2013 kwakuliphutha. UNkosikazi uRoselyne Nkomo kwakungamelanga abengumeli wakithi. iTsholotsho isizakhanya, izwakale khonale esigodlweni,” nguMnumzana Malakhi Tshuma wesiqintini seKapane.
Kusenjalo, ngempelaviki edluleyo abesifazane abakubandla leZanu-PF batshonele ukufundisana ngemithetho yokhetho.
Esiqintini seTshitatshawa uKhomuredi Sithembile Gumbo ubephethe inkundla efundisa omama ngokuvota kuhle.
Omama lamantombazana azavota okwakuqala batshelwe ukuthi bavotele ikusasa yabo.
“Votani lisazi ukuthi lilungisela ikusasa lenu. Ungavoti ukhangele eceleni, julisisa ingqondo uvotele intuthuko.
Bomama yini eliphethe ikusasa yelizwe ngakho kusukela manje asiqakathekiseni inhlelo zentuthuko ukuze sibelokuthula lempilakahle,” nguKhmrd Gumbo lo, ophinda abengunobhala wequla leZanu PF Women’s League esabelweni seMatabeleland North.
Imizamo yokukhuluma loNkosazana Getrude Sibanda kunye loMnumzana Busani Ncube abangabanye abafuna ukuvotelwa yehlule ngoba amafoni abo ebengangeni.
