‘Kasazi ukuthi ufunani uKhama’

18 Jan, 2018 - 00:01 0 Views
‘Kasazi ukuthi ufunani uKhama’ UKhama Billiat

uMthunywa

YiNtatheli kaMthunywa
ISIFISO sikaKhama Billiat ngesokuyadlala phetsheya kolwandle. Kulisizini usekhonjiswe ngamaqembu ase-Saudi Arabia, Egypt, iOrlando Pirates leKaizer Chiefs zaseSouth Africa.

Lokho kubikwa sekudida ingqondo zalumdlali osesalelwe zinyanga eziyisithupha edlalela iMamelodi Sundowns.

Umaneja kaKhama Billiat, uSiyabulela Loyilane, uphumela sobala ngodletshana oluhlanganisa  umdlali wakhe leqembu leKaizer Chiefs.

NgeSonto edluleyo kusabalale amahungahunga okuthi uBilliat usesayine isivumelwano sokudlalela aMakhosi.

Isivumelwano sikaBilliat leSundowns siyaphela ngoNhlangula.

ULoyilane uthe asikho isivumelwano phakathi kukaBilliat aseyisayine leChiefs.

“UBilliat usasengumdlali weSundowns. Yebo ngokwemithetho yeFifa usengasayina isivumelwano sokudlala esitsha kodwa okwamanje akulanto aseyenzile. IChiefs ayikaze ingithinte futhi uBilliat akakasayini isivumelwano leqembu leli, ngokwazi kwami.”

UBilliat akakaze abonakale kuSundowns emidlalweni emithathu esike sayidlala selokhu kubuywe kukhefu likaMpalakazi.

“Uyajima leqembu, into ayifunayo yikudlala. Isifiso sakhe yikuyadlala phetsheya kolwandle. Usezinqobe zonke izicoco ezikhona eSouth Africa ezimqoka. Kanti yini engabe usayihlalele?” kubuza uLoyilane.

UBilliat kuthiwa ufunwa ngamaqembu aseSaudi Arabia lase-Egypt. Umthombo wethu uthe zikhona izicelo kodwa iSundowns ayizizwa.

“Kunzima ukusebenza leSundowns nxa umdlali sekufanele ayodlala phetsheya. UBilliat ulazo izicelo emaqenjini aphetsheya. Ulazo futhi ezinhle kodwa iSundowns ifuna okungaphezulu kokubekwa ngamaqembu. UBilliat ngeke ngimeluleke ukuthi ajoyine iChiefs kodwa ngeke wazi ngabadlali. Nxa ethi ufuna ukuyodlala kuyo, uzahlala phansi lomaneja wakhe  kubonwe ukuthi kwenziwa njani. Phela ukudlalela iChiefs kulaba bafana kuseyinto enkulu kakhulu,” kutsho umthombo.

UBilliat ufike kuSundowns ngo-2013 esuka ku-Ajax Cape Town. Usezinqobe zonke izicoco ezimqoka leqembu. Ukhale wemuka lezicoco ezimbili ze-Absa Premiership, eseTelkom Knockout, Nedbank Cup, Caf Champions League leseCaf Super Cup.

Umdlali wokucina ukusuka kuSundowns aye kuChiefs  nguLeonardo Castro osanda kufika eqenjini. Ngaphambi kwalokho kufike uRamahlwe Mphahlele ofike watshaya into encomekileyo kuMakhosi ngaphambi kokuthi alimale.

ISundowns akuyihambeli kahle kulezi insuku. Selokhu kuqale umnyaka isitshaywe kabili. Iqale yaqunjwa phansi yiPolokwane City nge 3-2 njengoba iphindwe yi-Orlando Pirates nge 3-1 ngempelasonto. Isanqobe umdlalo owodwa lapho etshaya khona i-Ajax Cape Town nge 2-1.

NgoMgqibelo izobhekana lePlatinum Stars eLoftus Stadium, ePitoli, ngo-6 ntambama.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds