uMthunywa
Umkami uyangifihlela imali lokunye
NGILEMINYAKA emithathu ngendile. Umkami ngumuntu olemfihlo ezenza ngibone sengathi ngenza iphutha ngokuthathwa nguye. Ulabantwana abane phandle, labo ngazitholela ukuthi ulabo. Ngibona sengathi ubengakakulungeli ukuthatha ngendlela enza ngayo.
Ngiyazi ukuthi sidinga uncedo kodwa yena kaboni njalo. Ngiyamthanda umkami kodwa lokhu kuyasehlulakanisa kakhulu. Ukuba lemfihlo sokuze kusemalini. Kangitsheli ukuthi kungani engabuyi lemali endlini. Ngibhekane lobunzima, ngicela uncedo.
Impendulo
Abanye abantu bathatha isikhathi ukujayela ukuthi sekulomuntu empilweni yabo ngemva kokuthatha. Khangela ubephila yedwa kungelamuntu obekumele amchazele ngezinto ezehlukeneyo. Ngakho kungenzakala ukuthi umkakho kusenzinyana ukujayela umehluko lo. Zama ukukhuluma laye ukuthi kumele kungabi lemfihlo emzini wenu njengabantu abathetheneyo. Abanye kubangelwa yindlela abakhule ngayo. Kukhangelisise lokhu ngaphambi kokuthi ufulathele umuzi wakho.
Ngithole ukuthi umkami yisigebenga
Silomnyaka sitshadile lomkami. Ngisanda kuthola ukuthi akasebenzi la ayengitshela ukuthi usebenza khona.
Uthengisa izidakamizwa futhi lisela. Uhlala ephethe umbhobho ngitsho lasendlini. Uwubeka loba ngaphi. Abangane bakhe yimigulukudu yabotsotsi. Sengimesaba futhi angiziboni ngisenelisa ukukhuluma laye ngalolu daba. Angisafuni ukuba laye.
Impendulo
Kusobala ukuthi kungani umkakho engakutshelanga ukuthi usebenza ngaphi. Kungenzakala ukuthi ulenhloni ngempilo ayiphilayo. Futhi kuyimpilo eyingozi phakathi kwenu lobabili. Kuhle ukuthi uyesabele impilo yakho ngoba kayisiyo indlela elingakha ngayo umuzi wenu. Okwesibili akathembekanga kuwe ngoba akazange aphumele egcekeni ngempilo yakhe ukuze uzikhethele.
Zinengi-ke izigebengu ezitshintsha impilo emva kokuhlangana lomuntu ezimthandayo. Ngakho kubalulekile ukukhuluma laye. Kungenzeka ukuthi ulezizatho ezenza aphile impilo le. Abanye bangena ngoba bengatholi umsebenzi, abanye ngoba bengenelisanga ukuqeda esikolo. Mbonise ukuthi ikhona enye impilo ngaphandle kwempilo yobugebengu.
Kalangane kodwa kayifuni eyami
Asikwazi ukuthola abantwana lonkosikazi kodwa mina ngilayo ngaphandle eleminyaka engu-12. Ihlala lonina kodwa iyavakatsha ngamakhefu. Unkosikazi uhlezi exabana layo ebanga into engalamsebenzi. Umntanami useze engasakujabuleli ukuba lathi ngenxa yakhe. Kunzima ukuthi ngikumele lokhu njalo sekudala ingxabano enkulu phakathi kwethu.
Impendulo
Akulula ukwazi ukuthi kawungeke ube lomntwana njengomuntu wesifazane ikakhulukazi ngoba abantu besifazane bakhula betshelwa ukuthi uze emzini ukuzokwandisa umuzi ngakho zwelana lonkosikazi yakho. Kuvamile ukuthi abantu besilisa bayithathe njengento encane ukuthi inkosikazi kayizali. Ngaleyondlela owesifazane ubona sengathi awumsekeli. Ungakuthathi ngokuthi unkosikazi wakho ulesikhwele lomntanakho. Indlela ongamsiza ngayo unkosikazi wakho yikuthi umenze azizwe ebalulekile loba engabatholi abantwana. Ngoba abantwana akusiso isabelo sawo wonke umuntu.
