uMthunywa
Silo Ophezulu Stinta kugwalo
SIQHUBEKA ngendatshana yethu yenhlupheko zabantu besifazana ngokutshiyana kwabo. Silokhu sikusahluko sethu sokuqala lapho uMaMkhwananzi simthola ephakathi kokudideka engasakwazi lokuthi enzeni ngephepha alitshiyelwa nje kungelangcazelo. Simbona esememeza umakhelwane wakhe ecela ukuthi abuye azomfundela isamanisi le ayeyitshiyelwe, kulapha esihlangana khona lolunye uhlupho lwabantu abesifazana asebekhulile abazithola bephakathi kwalo, ukusweleka kwemfundo luhlupho olukhulu, siyambona uMaMkhwananzi ezama ngamandla wonke ukuthi azibalele kodwa akukho ngitsho lokukodwa akudobhayo.
Ngokuhlalisana kuhle kwabo makhelwana, unina kaFodiloni weza njengokucelwa kwakhe nguMaMnkandla.
Wayikhangelisisa incwadi le wasemazisa ukuthi yayivela kumanisipala wedolobho lakoBulawayo ababemazisa ngokuthi indlu yakhe yayisile zinyanga ezilitshumi lambili ingakaze ibhadale, kunjalo nje kwakudingeka inkalakatha zemali zokubhadalela indlu. Okubuhlungu kakhulu yikuthi leyo mali yayifuneka ngensuku eziyisikhombisa. Okunye njalo yikuthi indlu le yayizafakwa ku okisheni.
Lapha abantu abatshiyeneyo abazayithenga ngemali ezitshiyeneyo ize icine isithengwe ngumuntu oyedwa. Kwakuzindaba ezibuhlungu kakhulu kuMaMkandla waqala ukukhumbula ukuthi indlu le wayeyithole ngendlela ebuhlungu lomuyi, kodwa konke lokhu umansipala wayengela ndaba lakho. Pho wayezaqutha ngaphi evele eseluphele nje evele egcine lentandane ezingelabani?
UMaDlamini wazama ukuxwayisa ugogo ukuthi ake ayebonana lokhansila mhlawumbe wayengasizwa isikhalazo sakhe. Kwelika khansila ugogo wala wemba phansi ekhala ngokuthi wayezabe egeze kusiphi isifula ukuze athole uncedo oluvela kukhansila. Konke lokhu kuveza inhlupho ezitshiyeneyo lokwanda kwazo. Kanti pho baqonde kubani ukuze bathole uncedo?
Indlela akubeka ngayo uMaMkandla kwakuchaza ukuthi abantwana laba ayehlala labo basebezaphenduka inyamazana kambe sebekhulela egangeni njengezikhwehle.Kubuhlungu nxa abantu sebengena ezigabeni ezinje ezibuhlungu lapho sinanzelela indawo yokuhlala.Kuyisikhuthazo-ke ukuthi lapho abantu belethuba lokwakha emakhaya kabakwenze ukuze nxa kusiba nzima edolobheni umuntu azithole elendawo yokuphephela.
Siyananzelela uMaMnkandla esezisola ngelithi ngabe wayelomuzi kodwa lokhu wayezakwenelisa ukuyaphephela ekhaya labantwana.Kwakuyinsindabaphenduli yendaba ayengakwazi ukuthi wayezayixazulula ngaliphi uMaMnkandla. Kwakucaca nje ukuthi umanisipala ugcina abalemali, abangelayo kabalamgcini.
