uMthunywa
Arnold Ndlovu
KULENINA elisezandleni zamapholisa kulandela ukubanjwa litshwathike umgodla we2kg obulembanje ebhasini ebisiya koBulawayo ivela eTohwe, eMatopo.
Umetheswacala uPrimrose Dube (42) ubotshwe ngamapholisa mhlaka 10 Zibandlela esolelwa ukuthengisa imbanje.
Ekhuluma lephephandaba likazulu, uMnumzana Steven Maseko owayesebhasini ngesikhathi eNkszn Dube ebotshwa uthe bamangala ngesikhathi amapholisa etheleka ebhasini ezobamba umetheswacala bamehlisa ibhasi bekhangela lempahla zakhe.
“Ngesikhathi simiswa ngamapholisa buqamama lezitolo zakoBagcwele samangala ngoba kuyindawo okungami khona amapholisa omgwaqo. Amapholisa kazange azihluphe ngokukhangela imota esasihamba ngayo kodwa bahle bangena bedinga uDube, sebemtholile bamehlisa ebhasini basetsha izikhwama zakhe lapho okwatholakala khona imbanje,” kuchasisa uMnu Maseko.
UMnu Maseko uqhubekele phambili wathi okwenziwe ngamapholisa kuveze ukuthi umama lo ubesengumuntu owaziwayo ngabomthetho ngokwenza ukuganga kwakhe ngoba akuzange kubathathe isikhathi ukuthi bathole abakudingayo.
“Kube sobala ukuthi ukhona oncwebe amapholisa indlebe ngoba ngesikhathi kutholakala imbanje esikhwameni kazange aziphike ukuthi ngezakhe, ukhale kuphela ngokuthi abantu balomona sebengaze bamangalele emapholiseni,” kuchaza uMnu Maseko.
UMthunywa wenelise njalo ukukhuluma lometheswacala uDube ongaphikanga ukuthi imbanje atholakala elazo ngezakhe, andubana athi yiyo indlela aziphilisa ngayo loba nje ingekho emthethweni.
“Ngiyakwazi ukuthi umsebenzi ebengiwenza awuvunyelwa emthethweni, kodwa bengingelayo enye indlela engingaziphilisa ngayo ngakho ngaqala ukuzithengisela imbanje ezinye ngizisa edolobheni lakoBulawayo ngoba kulemali engcono kulasemaphandleni,” kuchaza uDube.
Isikhulumi samapholisa eMatabeleland South uInspector Philisani Ndebele uthe indaba yenina elabanjwa lilomgodla wembanje yafika ezandleni zabo njalo balindele ukuthi iyethoniswa emthethwandaba.
“Kulenina elabotshwa ngemva kokutholakala lilomgodla we2kg olembanje, khathesi silindele ukuthi icala lakhe liyengena emthethwandaba,” kuphetha uInsp Ndebele.
