uMthunywa
Thando Dube
UMAHOTSHA owafaka inhlanyelo yendoda esithweni sangasese somntwana oyinkazana ujike waba yisimungulu emthethwandaba ebuzwa ngokuthi kungani wenza lokho.
UNothando Ngwenya oleminyaka engu-18 yokuzalwa ohlala elokitshini leCowdray Park wenza insindabaphenduli le mhlaka 27 Lwezi.
Lakhathesi uNgwenya kakagwetshwa ngoba lapho amiswa khona emthethwandaba wehluleka ukuvula umlomo.
Kubikwa mhla edala icala leli, uNgwenya wafika endlini ethwele ikhondomu egcwele ubudoda wabugcoba phezulu kwesitho sensitha somntakamakhelwane oyinkazana oleminyaka eyisithupha.
Umthethwandaba weWestern Commonage uzwe ukuba umetheswacala wabizela umntwana ekamelweni lakhe watshiya emvalele phakathi.
Waphuma okwesikhatshana, waphenduka ethwele ijazi lomkhwenyana elisebenzileyo wafika wafaka esithweni somntwana lo owayelokhe esendlini wamekela waya ngakibo. Unina womntwana wananzelela ukungaphatheki komntwana ngoba elokhu esenwaya ethi uyalunywa wasedingisisa udaba wayabikela amapholisa.
Ebuzwa ngumantshi uMnu Ncube ukuthi kungani wenza icala leli, umetheswacala wakhetha ukuthula.Umantshi wambuzisisa ukuthi angaba lamazwi yini angawatsho ukuthi azivikele, kodwa uNgwenya wakhetha ukuvala umlomo.
Ngesizatho sokuthi umetheswacala wakhetha ukuthula, umantshi unqume ukuthi icala ledluliselwe phambili kumhlaka 29 kuZibandlela, umetheswacala aqhubeke evalelwe entolongweni.
