uMthunywa
BAKWETHU limqoka njalo lijulile elithi abake babonana bayaphinda babonane njalo, elokufa kalitsheli. Kusenjalo oMandulo bathi isitsha esihle kasidleli okuchaza ukuthi sifa lobuhle baso uzulu asale enkemile nje kumpompoze izinyembezi kudane ngitsho lemvelo.
Kunjalo bakwethu, sasikuzwele komakhelwane kodwa kubalulekile ukuthi sihlale siqaphele ngoba kusasa kunganeno. Lapha ngichaza ukuthi umhlaba uleziga zawo ngakho kakho ongehlelwa yisiga empilweni. Yebo kambe singahlala siqaphele njalo sihambe ngobuqotho kodwa nje impungutshe yalesulela igqumutsha lingazi lutho.
Ungalibali ukuthi oNdukuzibomvu amajaha omkhonto babengasomi mhla besungula amazwi athi impunzi yalona inqina ngokukhamela amacimbi emasimbeni alo. Yebo phela uzulu wonke akakholwa ukuthi inqina yilo elebe amacimbi la kukanti cha lifela amafufu okwegundwane.
Qaphela ukuthi empilweni inkinga ziyabehlela abantu kungakhathalekile ukuthi ngubani. Ngokunjalo futhi elokufa kalaze laqoqoda latsho ukuthi lamhlanje ngikhona. Angithi nxa lingaqoqoda kakho ongalimela ngoba kakho othanda ukufa. Ngithemba kungathunqa uthuli lothudlana mhla liyaqoqoda ngoba phela abaqoqodelweyo laba bazabe besinya amahlabathi bebelethwa zinyawo.
Elokufa leli engilithintayo liza ngendlela ezinengi phela ngoba kungenzeka ukuthi lithutshe lingumuntu ongaziwayo kumbe ngesihlobo. Yikho phela kuthiwa ungabomethemba umuntu kungakhathalekile ukuthi ngubani. Angithi umuntu uyajika njalo ngeke wazi ukuthi ucabangani lapho akhona.
Kwakube buhlungu ikakhulu nxa ukufa lokhu kusiza lomfowenu kumbe isihlobo ngoba uyabe ungakhangelelanga.
Kuyenzakala ukuthi umfowenu kumbe isihlobo sikuholele amanzi ngomsele usale ugcwele ingcekeza. Khona ubutha lobu oyabe sulabo kakho ongabesula ngoba phela kusuka kube nzima ukuthi uzulu akwazi njalo akukholwe ukuthi ukufa lokhu awuzidingelanga.
Egwalweni olungcwele uCain wabulawa nguAbela ngenxa yombango wokuthi wayelesiphiwo esihle. Kusenjalo uJosefa wathengiswa ngabafowabo bembangisa njalo isipho sakhe sokuba ngumphuphi kanye lokuthandwa kwakhe nguyise.
Yebo phela kakho ongakuboniyo lokhu ngakho umfowenu ungaze walibala ukuthi yiso isitha sakho ngoba usengakubulala okwedlula umuntu wezizweni. Ngingayibeka kanje lindaba ngithi lamhlanje kusasekuhle sisancokola sonke bakaMalandela ngakho akwaziwa ukuthi kusasa kuyakusa omunye phakathi kwethu engaphi.
Mthwakazi kaNdaba lingalibali ukuthi ukufa nxa kusiza lomfowenu akwaze kwavikeka ngakho kasiqapheleni izihlobo zethu ngoba yizo ezisilethela ukufa emhlabeni. Yebo phela kayisizo zonke ezilempiko ezindizayo kodwa nje abadala bathi umsizi ngowembiza zonke.
Injalo impilo bakwethu, abake babonana bayaphinda babonane ngakho ngilifisela inhlanhla enkulu kakhulu kulo umhlaba njalo philani ngokunanzelela ngoba ezimbi kazaze zaphela futhi zizingela abalungileyo.
Sengitshaye kwenela bakaMalandela akube kuhle kusasa kuse siphila sonke njalo sisendaweni ezinhle futhi sikhululekile.
