uMthunywa
Gladmore Ncube
YEHLELWE yisijeziso esinzima indoda yeWest Acre endaweni yaseMncazini eyakhandwa ilele lomfazi womnikazi yagogeka izandla zonke zombili.
Indoda le, uMnumzana Martin Sithole watholakala esemacansini loCynthia Ndlovu unkosikazi kaBhekimpilo Chenjera kunyanga ezimbili ezedluleyo andubana ehlelwe ngamashwa la.
Ngesikhathi laba ababili bekhandwa nguMnu Chenjera wathi kasoze alwe labo kodwa uyazi ukuthi uzakwenzani kungakho ngemva kweviki uSithole wabonakala izandla zombili sezigogekile.
Inthatheli ikhulumisane lesinye isakhamuzi sakule indawo esisiveze ngokuthi nguMaNyathi esithe sona kucatshangelwa ukuthi uSithole wagogwa yisenzo sakhe sokulala lomfazi amaziyo ukuthi wendile.
“USithole ngumuntu esihlala laye lapha esigabeni kodwa ukhetha ukuthi alale lomuntu amaziyo ukuthi uhlezi lomkakhe. Angitsho ukuthi yisenzo esihle sokuthi uChenjera amenze isigoga kodwa lakho uyabe ungumuntu onjani olala lonkosikazi womuntu ukwazi ukuthi ulendoda yakhe.
“Akulamuntu ongatsho ukuthi uChenjera nguye omgogileyo kodwa asilazi iqiniso ngoba phose isigaba sonke siyafakaza ukuthi uChenjera watsho ukuthi yena uzamlungisa lowo ofohla emzini nxa engekho,” kuchaza umfakazi oqotho uMaNyathi.
Inthatheli ikhulumisane loNkszn Ndlovu ibuza ngaloludaba othe uMnu Sithole wagogeka kodwa akula bufakazi bokuthi lokho ake babalakho yikho okwaba yimbangela yokugogeka kwakhe.
“Yebo ngiyavuma ukuthi sake sathandana loSithole kodwa ukulimala kwakhe akutsho ukuthi saba lesandla kikho ngoba mina lomkami sakhulumisana njalo saxolelana ngakho ke akuzange kube lokubophelana umoya. Loba nje uSithole wayibalekela indaba le waya kibo eGwanda mina lomkami sakhetha ukukhulumisana ngayo saxolelana,” kuchaza uNkszn Ndlovu.
Iphephandaba likazulu likhulumsane njalo loMnu Chenjera ngaloludaba wathi yena lokhu esimbuza khona wakuzwa njalo wadlula kikho kudala.
“Udaba lolu olubuzayo ngezwa ngalo kodwa ke mina engingakutsho yikuthi mina lonkosikazi wami sakhulumisana kwaphela ngakho ke ongakubamba yikuthi mina lonkosikazi wami siphila kuhle okwemuva nxa ukudinga akula engingakutsho,” kutsho uMnu Chenjera.
Intatheli izamile njalo ukukhulumisana loMnu Sithole kwehlula ngoba inombolo zakhe zocingo bezingangeni kukanti kubikwa selesikhathi wasuka kule indawo esiyadinga usizo.
