Inguqu iletha intuthuko koGodlwayo

Inguqu iletha intuthuko koGodlwayo

0 227
Umdlali weMbembesi FC uChristopher Dube (ophambili) ngemva kokwamukela inkezo yeGodlwayo Social Soccer League

Nkosilathi Sibanda
KUMINYAKA elandelayo amaqembu enguqu adlala kuGodlwayo Soccer League azaphakanyiswa ngokungeniswa kunhlanganiso yeZimbabwe Football Association.

Lokhu kuza ngemva kokuba amaqembu akuligi enkulu eyeCastle Lager esekhwabithe abadlali abathile kuligi yaseFilabusi le. Iphephandaba likazulu lizwe ukuba iGodlwayo Soccer League isihuge abaqeqetshi abavela kumaqembu atshiyeneyo abaveze ukuba ithalenta lenguqu elitshengiswa ngabadlali bakulindawo liyamangalisa.

Iligi yakoGodlwayo le izakhele ibizo ngokuqoqa imincintiswano ebisekelwa ngamadoda amathathu akhulela kulesisigaba. Amadoda la nguBhekimpilo Maranda Sithole, uZibusiso Majankwe Ncube loKossam Mavuna Ndlovu.

Inhlanganiso yabo esiguqula isimo sezemidlalo koGodlwayo ibizwa ngokuthi yiMMM. Ngokunanzelela ukuthi intsha yakoGodlwayo iswela amathuba kwezemidlalo, bobathathu laba baqala inyathelo lokuqoqa umqhudelwano wamaqembu la minyaka yonke. Umqhudelwano lo udibanisa amathimu alitshumi lantathu akuligi yakoGodlwayo le.

Amalunga eMMM la abike ukuba ukuze abadlali bakanobhutshuzwayo abasemaphandleni bathole amathuba okufinyelela amaqembu amakhulu, badinga usekelo.

NgoMpalakazi kubonakele ukuthi kuGodlwayo ligcwele ithalenta lenguqu kubafana abasacathula mhla kuqoqwe umncintiswano.

Umqeqetshi weBosso omutsha uMadinda “Khathazile” Ndlovu wayekhona kulumqhudelwano owanqotshwa yiMbembesi FC.

Ekhuluma loMthunywa, uZibusiso Manjankwe Ncube ongomunye wabasekeli bomqhudelwano uthe sebananzelela ukuba abafana bakoGodlwayo baphiwe emdlalweni ukwedlula abafana basemadolobheni.

“Kuyadingeka ukuthi njengezakhamizi zakoGodlwayo sisukumele phezulu sincedise abafana bakithi. Sikubonile njengeMMM ukuthi siphosele okuncinyane esilakho sivuselele inguqu endaweni yakithi.

“Sizama ukuthuthukisa isizwe sakithi, sidonsele abadlali abasakhulayo duzane lamaqembu amakhulu adlalela emadolobheni. Ngelinye ilanga singathanda ukuthi koGodlwayo kube leqembu elitshibilika kuPSL,” kutsho uNcube ongomunye wamalunga ebhodi yeMMM.

Umgcinisihlalo weGodlwayo Soccer League uNorman “Kiss Kiss” Sibanda uthe amalunga enhlanganiso yeMMM aselethe ukukhanya kuGodlwayo.

“Sekuthwe dlwe kwelakithi. Sibonga bonke abasekeli bethu, ikakhulu abafowethu beMMM. Sesibone inguquko enkulu kubadlali labaqeqetshi bethu. Okwamanje silamaqembu alitshumi lantathu njalo sikhangelele ukwengeza ngeqembu elilodwa kulisizini. IGodlwayo Soccer League ihlose ukungena kuligi ka-Division Two kuZifa,” kutsho uSibanda.

UBhekimpilo Maranda Sithole ophinda abengusomabhizimusi wodumo koBulawayo lakoGodlwayo uthe isifiso sabo ngesokuthi babambane labanye abaphuma kuGodlwayo ukuze kuphakanyiswe ithalenta labantwana.

“Ezemidlalo, ikakhulu inguqu, zilakho ukwakha umphakathi olekusasa enhle. Abantwabethu akumelanga batshonele ukuhlala ezitolo benatha utshwala, befunda okungayisikho. Sifuna ukukhanyisa uGodlwayo sisebenzisa ezemidlalo.

“Ngakho sicela bonke abaphuma kulindawo abaseNgilandi, Australia, Melika laseSouth Africa ukuthi bahlangane lathi senze okukhulu,” nguSithole lo.

USithole uthe benelisa ukunikeza abadlali lamaqembu imivuzo engcono kulandela ukudlala kuhle kumqhudelwano we-Godlwayo Soccer League.

Kumivuzo le, kubikwa lenhlanganiso ephethe ngezengqubekela phambili iGodlwayo Community Development Trust yanikeza i$300.

“Sanikeza imivuzo kuMbembesi FC eyathola i$450, kwalandela iDekezi FC eyaphiwa i$200. Iqembu elaphutsha likunombolo yesithathu kwabayiSilalatshani FC eyabuyela ekhaya iphethe i$100. Wonke amaqembu alandelayo athola i$30 linye ngelinye.

“Sibonga induna yakithi uVezi Maduna ngokusekela ezemidlalo njalo siphe lesibongo esikhulu kuMalachi Nkomo olilunga ledale lePhalamende leNsiza South.”

SIMILAR ARTICLES

NO COMMENTS

Leave a Reply