uMthunywa
Thando Dube
KULENINA lelokitshini leCowdray Park koBulawayo elimiswe phambi komthethwandaba lisetheswa icala lokuzama ukugwaza umntanalo ngomhedla wengqamu kubangwa indaba kumabonakude.
Umsolwa uShantelle Sibanda (26) umiswe phambi komthethwandaba weWestern Commonage esetheswa icala lokuzama ukugwaza umntanakhe oleminyaka emihlanu.
Umtshutshisi kulelicala uNkosazana Esther Sibanda ubikele inkundla ukuthi mhlaka 1 Zibandlela 2018 umsolwa wazama ukubulala umntanakhe oleminyaka emihlanu ngengqamu ngemva kokuxabana lonina uNkosazana Meltha Moyo kubangwa ukuthi kubukelwe siphi isititshi (channel) kumabonakude.
Kubikwa umetheswacala wahlosa ukugwaza umntanakhe ngemva kokuba unina ecele ukubukela iZBC yena umetheswacala esabukele i-movie.
UMthunywa uzwe ukuba umsolwa ngemwa kwalokho waqala ukuthethisa unina esithi uyamzonda ngoba nguye yedwa umntwana wakhe ongafundanga ngakho yena lomntanakhe sebethutha emzini kanina.
Umntwana lo owayesidla ngalesosikhathi wala ukuhamba lonina ngakho umetheswacala wathukuthela ngesenzo lesi yikho okwenza wathatha ingqamu ezama ukumgwaza kodwa wavinjelwa nguNkszn Moyo owambamba watshela umntwana ukuthi abaleke aye komalumakhe.
Umetheswacala walandela umntwana lo komalumakhe wafika wathembisa ukuthi uzatshisa indlu nxa umntwana lo engaphumanga. Umntwana lo wasizwa ngugogo wakhe uNkszn Moyo owamfaka emoteni wayabikela amapholisa ngesenzo lesi.
Ebuzwa emthethwandaba, umetheswacala ulandule ukuthi walenza icala leli.
Ngemva kokulalela icala leli umantshi uTancy Dube udlulisele ukuthonisiswa kwecala kumhlaka 12 Zibandlela kusacutshungulwa ngecala leli.
