Usobhuku utshontsha inkomo agwetshwe iminyaka 10

Usobhuku utshontsha inkomo agwetshwe iminyaka 10

0 155

Arnold Ndlovu
KULOSOBHUKU wesigabeni seShangani ogwetshelwe ukuyapika ejele iminyaka elitshumi kulandela ukutholakala elecala lokutshontsha inkomo.

USobhuku uFortune Maphosa oleminyaka yokuzalwa engu-53 ubemiswe phambi komthethwandaba weWestern Commonage kuviki ephelileyo esetheswa icala lokutholakala elenkomo ezitshontshiweyo.

Umtshutshisi kulelicala uNkosikazi Esther Sibanda ubikele inkundla ukuthi besokulesikhathi abantu bekhala ngokutshontshelwa izifuyo zabo ikakhulu inkomo njalo bezingabonakali ukuthi ziyangaphi, loba izakhamizi bezibikela amapholisa akukho obekusenziwa.

Kubikwa ngenxa yalokhu izakhamizi zenza amaqembu okulinda esigabeni ebusuku okuyikho okwenza uMaphosa wabanjwa xhaka phakathi kobusuku ethwele inkomo ezintathu zezakhamizi ngemota zasezimbopha zamusa emapholiseni.

Ebuzwa ngecala abeletheswa uMaphosa ulivumile.

“Mina icala lokutshontsha inkomo ngiyalivuma, ngithanda ukuxolisa omakhelwane bami ngokubathathela izifuyo zabo bengakwazi,” kuchasisa uMnu Maphosa.

Ngemva kokulalela icala, umantshi uNkosazana Tancy Dube uthole umsolwa elecala lokutshontsha inkomo waquma ukuthi avalelwe ejele okweminyaka elitshumi lambili kodwa wasesesula iminyaka emibili kukhangelelwe ukuthi angenzi icala elifana laleli eminyakeni emibili ezayo.

Umantshi uphinde wabonga umphakathi ngokubambana ekulwiseni ubugwelegwele emphakathini wasegqugquzela uzulu ukuthi aqhubekele phambili esilwa lobubi.

“Siyawubonga umphakathi ngokulwa lobusela endaweni yabo, ngithanda ukukhuthaza umphakathi wonke ukuthi sibambane silwe lokuganga elizweni lakithi,” kuphetha uNkszn Dube.

SIMILAR ARTICLES

NO COMMENTS

Leave a Reply