Silo Ophezulu Stinta kugwalo Kunjalo ke

04 Jan, 2018 - 01:01 0 Views

uMthunywa

UDumazile zamehlula indaba zakhe wabona kungcono atshaye utshani. Abadala bathi icala kaliboli okuliqiniso, sibona amapholisa esethelekile emzini kaDumazile lapha efuna uDumazile ngabomvu ngecala lokutshisa isitolo sikaSithole begcizelela njalo lokuthi nguye owayengumaqhuzu ekuhleleni leso siga sokutshisa isitolo sikaSithole.

UMtalaselwa laye wayengelalo ulwazi ngakho wathembela kibo abomthetho ukuthi babezamdingela inkosikazi yakhe.

Siqala isahluko setshumi sona esilesihloko esithi Kunjalo-ke. Lapha-ke sithola uMtalaselwa esebuyele emsebenzini wakhe kwelaseMlazi. Kulapho izinto ezaqala ukutshintsha khona sikhangela ngezempilakahle. Wagula wabangwa lezibi, umkhuhlane wamhlaba ngendlela ebuhlungu, wayengafisi ukuvakatshela esibhedlela eziduduza ngelithi wayezaziqinisa ngezesintu, mhlawumbe wayezakwenelisa ukunqoba lesisifo. Ngokuhamba kwesikhathi kwabanzima izihlobo zaze zabona kungcono ukuthi zimthwalele esibhedlela, lapho okwatholakala khona uSithole kanye loMaNzimande inkosikazi yakhe khona, ipholisa elalinda esitolo sikaSithole labo belaliswe kuleso sibhedlela ngomkhuhlane owawuhambelana xathu lokaMtalaselwa. KwaNongoma lapho uDumazile ayebaleke khona wazithola laye selaliswe esibhedlela sakhona umkhuhlane utshinga. UDumazile wacela ukuthi kwaziswe abazali bakhe kanye lomyeni wakhe ngesimo ayesephakathi kwaso.

UDumazile wayesefisa kakhulu ukusondela kubafundisi ngakho-ke wacela ukuthi abizelwe umfundisi, onguye owafika wakhulumisana laye wamnika ithemba lempilo, laye uDumazile wazizwa eqina esiba lamandl, kulapho-ke abona kulithuba elihle ukuthi avume adundulule izono zakhe phambi kukamfundisi. Wazicacada zonke katshiyanga ngitsho lesisodwa. Abazali bakhe baphuza ukuthola incwadi eyayibazisa ngomkhuhlane loba nje bazama ukuphuthuma besazisa abakoZuma lapho uDumazile ayendele khona, labo besamukela umbiko abazange baphozise amaseko basukumela phezulu bengabambanga sikhwili. Ekufikeni esibhedlela lapha bafica sekukubi uDumazile esevele esebangwa lezibi. Yinye nje kuphela into enelisa ukuyikhuluma ngomlomo wakhe yikuzixolisela kuninazala kwabe kuphelile okwakhe emhlabeni. Imideni yomibili yabonisana ngendleko zokulondoloza isidumbu.

Kwavunyelwana-ke ukuthi wayezabekwa lapho ayendele khona loba nje yena mathupha wayesuke engumuntu owayengasela kwenza labakwabozala, kwasekungathi amazwi kaMtalaselwa asuka ngawo ayesegcwalisekile lapho athi khona kwakungasoze kube khona ukuvakatshelana okwakuzakwenzakala, kwangani wayevalelisela uDumazile lo owabuya esengothuleyo ekhaya lapha. Bafa baphela bonke abake bathandana loDumazile beqedwa yilesi sifo esingelaphekiyo.

Ngaleso sikhathi-ke abezempilo babengakatholi indlela zokwelapha umkhuhlane lo.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds