uMthunywa
Cornelius Luphahla
NGENXA yokuthanda utshwala kulendoda yesigabeni seDaluka eLupane egamule enye ngebhemba kubangwa utshwala.
Isehlakalo lesi senzakale ngoLwesine kuviki ephelileyo lapho uMnumzana Clifford Ncube aganyulwe nguMnumzana Godfrey Moyo ethi kungani enathe utshwala bakhe.
UMthunywa uvakatshele kule indawo wakhulumisana loMnumzana Thulani Mangena oyisakhamuzi sakule indawo walandisa ngendaba le ethi ubekhona mhla isenzakala.
“Sathi sihlezi ezitolo zeBaker uNcube wasenatha utshwala bukaMoyo ngesikhathi engekho esesambuzini.
“UMoyo wathi efika wabuza ukuthi ngubani onathe utshwala bakhe uNcube wathi nguye. Ngalesosikhathi bahle baqalisa ukuxabana mina ngakuthatha kancane ngithi mhlawumbe bayadlala.
“Ngathi ngisalibele ngixoxa labangane bami uMoyo wasukuma wagamula uNcube ikhanda ngebhemba wahle wawela phansi. Sathi sizama ukulamula wamphinda wahle wambulala. Sahle sabikela amapholisa eSt Luke’s abopha uMoyo, isidumbu sikaNcube sathwalelwa esibhedlela seSt Luke’s,” kulandisa uMnu Mangena.
Ekhuluma lentatheli uMnumzana Mfanelo Ncube ongumnewabo kamuyi uthe uzwa ubuhlungu kakhulu ngendaba le wabuya wasola abantu abanatha utshwala.
“Mina ngizwa ubuhlungu ngokufa komnawami ebulawelwa utshwala njalo ngisola izakhamizi zakule indawo ngoba besikhona kusenzakala lokhu kodwa zekela ukulamula. Lokhu kuveza sobala ukuthi bekuzijabulisa ukufa komfowethu.
“Okunye njalo abantu abanatha utshwala kule indawo bahlala besenza izinto ezimbi kakhulu ngakho kufanele babotshwe ukuze bakucine lokhu,” kutsho uMnu Ncube.
Usobhuku wakule indawo uMnumzana Eichard Ncube uvumile ukuthi indaba le uyayazi wathi esigabeni sakhe abantu bahlala bebulalana okuyinto embi kakhulu.
“Kuliqiniso sibili ukuthi uNcube uganyulwe nguMoyo wafa njalo ukubulalana lokhu sokuvamile esigabeni sami, asazi ukuthi kudalwa yini. Ngikhuluma nje lonyaka sokubulawe abantu abathathu ngakho amapholisa kufanele asincedise sibili ngoba ubugebengu sobubunengi kakhulu lapha,” kuchaza uMnu Ncube.
Imizamo yokukhulumisana lesikhulumeli samapholisa esabelweni seMatabeleland North uInspector Siphiwe Makonese yehlule ngoba ucingo lwakhe alubanjwanga muntu.
