uMthunywa
Gladmore Ncube loThando Dube
ZILOKHU zinathisana itiye izakhamizi zelokitshini leNketa 8 kulandela ukukhandwa kwenina kanye lendodakazi yalo ngoLwesibili ekuseni bezitika ngoluju lwemvelo lamadoda abomakhelwane babo, uMthunywa uyakuveza lokhu lamhlanje.
UMthunywa uzwe ukuthi uThembelani Moyo utholakale lomntanakhe uCharity Chaoneka bebhunyumunyu besemacansini lamadoda abomakhelwane kukheli ethi 2163 khonapho eNketa 8.
Kuzwakale ukuthi uChaoneka utholakale elomakhelwane wakhe olipholisa okutholakale ukuthi nguSiziba nje kuphela ohlala kukheli ethi 2166, otshiye umkakhe ozithweleyo kukanti unina ubeledlalicatsha lakhe elingumphathisikolo wesinye isikolo esiseTsholotsho okungasatholakalanga igama lakhe.
UMthunywa esizwa ngale insindabaphenduli uphuthume wayafika kulelilokitshi wafica izakhamizi zisidla amahabula zisithi loba kuyibufebe kodwa okomuntu lendodakazi yakhe ndawonye kuthena amadolo.
UMnumzana Benjamin Moyo uthe yena kakaze akubone ukuthi unina lomntwana bangenza ucansi ndawonye ubusuku bonke bekhangelene.
“Mina bengicabanga ukuthi uSiziba lipholisa elilengqondo kanti kacabangi ngoba ngezake atshiye umkakhe ozithweleyo ahambe ayelala lomntakamakhelwane aphinde enze ucansi bendawonye.
“Isenzo lesi sibi kakhulu ukuthi uNaCharity balale ndawonye loCharity besenza ucansi lendoda zabomakhelwane abacelana itswayi nsukuzonke,” kuchaza uMnu Moyo.
Omunye umfakazi ohlala kulelilokitshi othande ukwaziwa ngokuthi nguNkosikazi Moyo nje kuphela uthe yinhlamba enkulu enziwe ngomakhelwane bakhe njalo uzwa esenyanya nxa ecabanga ngakho.
“Lokhu lihlazo elikhulu, kambe sibili uyabe ungumzali onjani ovumela umntanakho athathele umakhelwane indoda uqede lapho ubize umakhwapheni wakho livumelane ukuthi selisenza ucansi ubusuku bonke libukelene liqakezelana izandla lendodakazi yakho.
“UmkaSithole uNaSesi uncwetshwe indlebe ngomunye umakhelwane wahamba lapho akade belele khona uSiziba wabaleka wangena ngaphansi kombheda wacatshisa ikhanda watshiya izibunu ezinqunu egcekeni.
“Wathi ebona umuntu ecatshile wahle wathi izibunu zendoda yami ngiyazazi loba kuthiwani nguye lo kuphela.
Eqeda ukwenza lokho wahle waqaleka wabhubhudla amagwebu wathwalelwa esibhedlela,” kuchaza uNkkz Moyo.
Ngesikhathi uMthunywa evakatshela kulelilokitshi uNkszn Moyo loChaoneka bebengekho beye emapholiseni.
UMthunywa uthinte uMoyo (uNaCharity) ecingweni ukuze azwisise ngaloludaba kodwa wathi kayisuye umnikazi wefoni yena nguNkosazana Thembelani Dube.
“Ayisuye NaCharity lo okhulumayo, mina nginguThembelani Dube uNaCharity uye emapholiseni e-Peace. Udaba lolu ngiluzwile kodwa engikwaziyo yikuthi kutholakale uChaoneka elele lendoda yomnikazi okukanina angizwanga lutho,” kuchaza uNkszn Dube.
Imizamo yokukhuluma loNkszn Chaoneka yehlule ngoba ubengabambi ucingo lwakhe.
