uMthunywa
Nomthandazo Ndlovu
ZITHWELE amagabha avuzayo izakhamizi zesigabeni seGungwe eGwanda ngesela eselibatshontshela lemini libalele njalo lizitshaya isifuba ngokuthi lona linikwa amandla okuntshontsha lidlozi lalo.
Isela leli elileminyaka yokuzalwa engu-17 liziqhenya ngokuthi loba into ifihlwe njani liyayizwa ngomnuko.
Ijaha leli kubikwa laqalisa ukwenza lokhu kuminyaka emithathu edluleyo ngesikhathi lisafunda esikolo seGungwe okuyikho okwadala ukuthi liyekele isikolo.
UMnumzana Admire Sibanda oyisakhamuzi sakule indawo uthe izakhamizi azisakwazi ukuthi zenzenjani ngojaha lo ngoba bangaze bahluthulele izivalo zabo batshiye lezinja zilinde imizi akulancedo.
“Thina asisakwazi ukuthi senzeni lezinja asisakwazi ukuthi sizifuyeleni ngoba ungena kunjalo, mina ungitshontshele imali ngisithi ngifihle ngiphelele, ngikhuluma nje utshontshile futhi komunye umuzi kodwa kabotshwanga.
“Lamapholisa sephakamise izandla ngoba angabotshwa lamuhla kusasa uvuka ephumile, ukuphuma kwakhe yikho okusimangalisayo ukuthi uphuma njani yena eyabe efakwe izankosi njalo lesitokisi sihluthulelwe,” kutsho uMnu Sibanda.
UMthunywa uzwe ukuthi isela leli lingavalelwa ngamapholisa ekuseni kuvuka kubetha umoya esitokisini okubangela ukuthi kucatshangelwe ukuba ukhululwa lidlozi lakhe leli.
Intatheli ikhulumisane lesela leli lona elivume ngokuziqhenya okukhulu ukuthi yena uyazitshontshela njalo kalanhloni ngakho ngoba indlela atshontsha ngayo iyisimanga njalo akula omunye umuntu olesipho esinjengesakhe esigabeni.
“Mina umuntu ehamba laphana ngihle ngibone ukuthi ulemali engakanani esikhwameni, nxa sengiyilandelela lapho ahlala khona ngihle ngiyizwe ngomnuko ukuthi ifihlwe ngaphi,” kutsho isela leli.
Liqhubekele phambili lathi idlozi lakhe yilo njalo elimncedisa lalapho okuthiwa kulezinja ezilumayo yena uyazingenela ekhululekile nje aze aphume zingamlumanga.
“Ukhulu wami lo owabhubhayo laye wayelesandla njengami, ubusela lobu ngabucatshelwa nguye ukhulu, njalo engakabhubhi wangithembisa ukuthi uzangincedisa kukho konke engikwenzayo, lapho engingena khona izinja ziyalala, yikho lapho engiba leqiniso lokuthi idlozi lilami,” kuchaza isela leli.
“Sengibotshwe kanengi mina kodwa ngibonga idlozi lami elingikhiphayo. Abantu nxa ngibatshela ukuthi ukhulu ngiyambona engikhulula nxa ngibotshiwe bathi ngiyahlanya kodwa ngiyabe ngikhuluma iqiniso.
“Ukhulu futhi nxa ngisiyatshontsha uyangitshengisa lapho okulemali khona.”
Ibuzwa ngodaba lolu induna uMathe uthe laye njengomphathi wesigaba sephelelwe ngamaqhinga okuthi enze njani ngesela leli.
“Mina angisakwazi ukuthi ngenzeni ngomfana lo ngoba uyatshontsha kakhulu izakhamizi zithwele nzima ngaye, lamapholisa abethe azabuya sibonisane ukuthi siphathe njani udaba lolu ngoba abantu bathwele nzima sibili lapha,” kuphetha induna uMathe.
