uMthunywa
Nomthandazo Ndlovu
ABALIMI bakhuthazwa ukuthi batshise amathole abo impondo ngoba kuqakathekile kakhulu njalo zingaba yingozi nxa sekhulile.
UNkosikazi Meltrin Bhebhe ongumlimi uthe impondo ziyingozi enkomeni ngoba zilakho ukulimazana.
“Impondo kazilunganga enkomeni, yebo ziyakhula ngokwemvelo kodwa nxa sesikhangela zilakho ukuba yingozi, inkomo ziyalwa ngakho nxa zisilwa ziyahlabana ngempondo lezi zicine zilimazana zibangela izilonda zona ezingalunganga ezifuyweni,” kutsho uNkkz Bhebhe.
“Kubalulekile ukutshisa amathole impondo ngoba nxa ekhula engela mpondo kulula ukuthwala inkomo nxa umlimi esezihambisa embukisweni ukuyazithengisa njalo kazingeke zibe yingozi kulabo abazisebenzayo,” kuchaza uNkkz Bhebhe.
UNkkz Bhebhe uqhubekele phambili wathi okunye okubangela ukuthi inkomo zicake zimpondo ngoba lazo zidinga ukudla.
“Impondo lazo zilegazi, zidinga ukudla ngakho nxa isifuyo silempondo ezinkulu ziyathathela inkomo ukudla icine sicaka, inkomo nxa sicakile ilakho ukuhlaselwa yimikhuhlane eminengi eyingozi enkomeni,” kuqhuba uNkkz Bhebhe.
“Inkomo zitshiswa impondo zisesengamathole hatshi sezikhulile, njalo kumele umlimi abuze kwabeVeterinary nxa engelaqiniso ukuthi ithole ulitshisa impondo selinganani, njalo kuqakathekile ukuthi asebenzise i-dehorning iron yona eyenzelwe lokho,” kutsho uNkkz Bhebhe.
UThulani Dube laye ongumlimi uthe kuqakathekile kakhulu ukutshisa amathole impondo ukuze zingakhuli ngoba azilunganga.
“Mina amathole ami ngiyawatshisa impondo ukuze zingakhuli, lokhu kuyanginceda kakhulu ngezikhathi zendlala inkomo zicakile lempondo lazo ziyabe zidinga ukudla khona okuyabe kungekho ngesikhathi sendlala,” kutsho uMnu Dube.
“Ukutshisa sokwenze kwaba lula nxa ngihambisa inkomo zami embukisweni lanxa ngithambisa amathokazi ami angesabi lutho ukuthi sezingangihlaba ngempondo,” kuphetha uMnu Dube.
