uMthunywa
Nomthandazo Ndlovu
ABALIMI bakhuthazwa ukunanzelela umkhuhlane we-foot rot njengoba sekuyisikhathi sezulu ngoba uyingozi kakhulu ezimvini.
Ekhuluma loMthunywa uDokotela Enart Mdlongwa weVeterinary Services uthe amagcikwane abangela umkhuhlane lo atholakala endaweni ezimanzi.
“Khathesi sokuyisikhathi sezulu ngakho abalimi kabananzelele ukuthi izimvu kanye lembuzi zabo akuhlali ezibayeni ezilomquba omanzi ngoba lapho yikho okutholakala ama-bacteria abangela i-foot rot.
“Izimvu zinganyathela lapho okulamadlelo kumbe udaka loba umquba omanzi ziyahlaselwa ngumkhuhlane lo wona ohle uhlasele inkumba ziqale ukubola,” kutsho uDkt Mdlongwa.
UDkt Mdlongwa uqhubekele phambili wathi okuqakathekileyo yikuthi abalimi babeleqiniso lokuthi izibaya zabo kazibi yingozi ezifuyweni zabo ngokuba manzi.
“Abalimi kumele nxa bebona ukuthi esibayeni umquba umanzi, kabalalise izimvu zabo edwaleni ngoba izikhathi ezinengi edwaleni kukalutshwane ukuthi umuntu athole udaka,” kuchaza uDkt Mdlongwa.
“Nxa izimvu sezihlaselwe ngumkhuhlane lo umlimi kumele asebenzise ama-antibiotics kanye le-wound oil ukwelapha izimvu esezihlaselwe ngumkhuhlane lo, njalo umlimi kumele abeleqiniso lokuthi akuhlali mpukane ezingabangela impethu esilondeni,” kuqhuba uDkt Mdlongwa.
UNkosazana Pretty Mleya ongumlimi laye ugcizelele wathi abalimi kumele bananzelele izifuyo zabo ngazo zonke izikhathi yikho bezabona esezihlaselwe ngumkhuhlane lo.
“Umlimi kumele nxa izifuyo zakhe zivela emadlelweni nsuku zonke ntambama azihlole abone ezingaphilanga. Nxa zikhona esezihlaselwe ngumkhuhlane lo uzazibona ngokuqhula, ukudla ziguqile kanye lokuthikaza ukuhamba, ngakho umlimi kuyabe sokumele abone ukuthi uyazelapha lezo azibona zisenza njalo,” kuphetha uNkkz Mleya.
