uMthunywa
Gladmore Ncube
ZIBABAZA kusa kwamalanga izakhamizi zesigabeni seChibila eBinga ngemva kokuba enye indoda engusobhuku kule indawo yethule udiwo olulesitho sowesilisa emphakathini ithi sikhathele ngokuphila ngobumnyama sifuna ukukhonza uNkulunkulu.
Imbedumehlwana le yenzakale emavikini amabili adluleyo lapho uMnumzana George Maphosa adide umphakathi ngokuveza igula elilesitho sowesilisa ethi ubesisebenzisa ukutshaya inala.
UMthunywa uzwe ukuthi uMnu Maphosa wenze lokhu ngemva kokuphenduka ebandleni leZviratidzo Zevapostori Church ebelivakatshele kule indawo.
Intatheli ikhulumisane loMnumzana Elijah Mpofu oyisakhamuzi sakule indawo walandisa ngendaba le ethi uMaphosa ubethuse kakhulu ngoba uthe isitho lesi ngesomnawakhe owafa etshaywa lizulu.
“Mina kangilankani ngendaba kaMaphosa ngoba wasenzela izimanga esingazake sizibone lokhe sazalwayo. Ngitsho ngoba uMaphosa wathi ngesikhathi ephenduka ebandleni lamapositoli waveza inkalakatha yesitho sowesilisa ethi ngesomnawakhe uMnumzana Richard Maphosa owafa ebulawa lizulu.
“Lokhu kwasethusa kakhulu, abafundisi balelibandla basitshisa yena wathi ubesisebenzisa ukutshaya inala njalo wasitshiyelwa nguyise uMnumzana Phele Maphosa. Ngikhuluma nje lakhathesi izakhamizi kazilankani ngaye ngoba kasikaze sikubone okunjeya ngoba wayezikhulumela yedwa,” kuveza uMnu Mpofu.
Ebuzwa ngale indaba uMnu Maphosa uvumile ukuthi uyayazi njalo iqhaga leli walitshiyelwa nguyise ubelisebenzisa ukutshaya ngalo inala.
“Mina okwenza ngagcina iqhaga leli yikuthi ubaba wangitshiyela wathi ngingalilahli ngoba lizangitshayisa inala.
Ngokunjalo ngathi ngemva kokuphenduka ebandleni lamapositoli ngahle ngalinika abafundisi balitshisa.
“Ngokunjalo khathesi sengaphenduka sengikholwa kuNkulunkulu ngakho kangisabuyeli ebunyameni ngoba kuyinto embi kakhulu.
“Loba kunjalo kangikwazi ukuthi isitho sowesilisa lesi esasisediweni lolu ngesikabani, ubaba nguye owayekwazi,” kutsho uMnu Maphosa.
Usobhuku omkhulu wakule indawo uMnumzana Philimon Ndlovu ebuzwa ngale indaba uthe uyizwile kodwa ngeke wachasisa lutho ngoba kufanele ichasiswe ngumnikazi.
“Indaba kaMaphosa yokutholakala elegula elilesitho sowesilisa ngiyayazi kodwa lokhu ngeke ngikuchaze ngoba kufuna umnikazi wakho,” kuphetha uMnu Ndlovu.
