Uncategorized

U-ED ukhetha abasekeli bakhe

28 Dec, 2017 - 01:12 0 Views
U-ED ukhetha abasekeli bakhe uRetired General Constantino Guvheya Dominic Nyikadzino Chiwenga

uMthunywa

YiNtatheli kaMthunywa
UMONGAMELI welizwe njalo engusibalukhulu wakuqala webandla leZanu-PF, uKhomuredi Emmerson Mnangagwa usekhethe uRetired General Constantino Guvheya Dominic Nyikadzino Chiwenga loKhomuredi Kembo Mohadi obenguMphathintambo wogatsha olubona ngokuvikeleka, ukuphepha kwelizwe kanye labalweli benkululeko ukuthi babe ngabasekeli bakhe.

UMnumzana George Charamba onguPresidential Press Secretary uthe ababili laba  bathatha izikhundla lezi ngokuphangisa.

Kubikwa izabelo zebandla leZanu-PF sezivumelane lesinqumo sikaMongameli welizwe sokuba uRtd General Chiwenga kanye loKhmrd Mohadi babe ngabasekeli bakhe nanko phela balolwazi olujulileyo oluzaphathisa ilizwe kanye lebandla elibusayo.

Ukubekwa kwababili laba kulandela isivumelwano somnyaka ka1987 seUnity Accord esenziwa phakathi kowayenguMongameli welizwe uRobert Mugabe kanye lomuyi uDokotela Joshua Nkomo.

“UMongameli welizwe webandla elibusayo leZimbabwe African National Union — Patriotic Front (Zanu-PF), uKhomuredi Emmerson Dambudzo Mnangagwa lamuhla unikeze abantu ababili izikhundla ezinkulu kakhulu.

“UGeneral Constantino Guvheya Dominic Nyikadzino Chiwenga (Rtd), usenguMsekeli kaMongameli welizwe njalo senguNobhala wesibili webandla leZanu-PF. UKhmrd Kembo C D Mohadi laye uphiwe isikhundla esifanayo sokuba nguMsekeli kaMongameli welizwe kanye loNobhala wesibili webandla elibusayo eZimbabwe iZanu-PF.

Izikhundla lezi kumele ziqale ukusetshenziswa ngokuphazima kweso,” kuchaza uMnu Charamba.

uKhomuredi Kembo Mohadi

uKhomuredi Kembo Mohadi

UMnu Charamba ukhulume lentatheli wathi izihlalo lezi eziphiwe amaqhawe la aziphiwe ngemva kokuhlolwa ukuthi zingathathwa yibo kuzaba lobukhokheli obuqotho elizweni.

“Ngokungena kwabasekeli laba umkhokheli welizwe uthole usekelo olukhulu oluvela esabelweni seMatabeleland  ngoba omunye umsekeli wakhe uvela kulesisabelo.

Kubikwa uKhmrd Mohadi ukhethwe phakathi kwamabizo amahlanu ayebekiwe agoqela elikaTshinga Dube, Simon Khaya Moyo, Jacob Mudenda kanye loObert Mpofu.

UKhmrd Mohadi wazalwa mhlaka 15 Lwezi ngomnyaka ka1949 eBeitbridge. Wafunda uSub A loStandard One eBetbridge eMtetengwe Primary School andubana ayefunda eGwanda Primary School uStandard 2 wakhe.

WayeseBeitbrigde Boarding School waze waqeda uStandard Six, eqeda lapho wayafunda eManama High School eGwanda, esuka lapho wayafunda eGoromonzi High School eMashonaland West lapho afika khona waxotshwa isikolo enguFomu 3.

UKhmrd Mohadi wangena kwezombangazwe ekuqaleni kwabo 1970  ngesikhathi aze atshiye ilizwe waya eZambia esiyafundela ubusotsha.

Ngaphambilini wasuka waya eRussia esiyafunda okujulileyo ngobusotsha. Ekuphendukeni kwakhe wafakwa kuZimbabwe Intelligence Services eyayingaphansi kweZapu. Wangena engaphansi kwamandla kaKhomuredi Ethan Dube kodwa wabotshwa wavalelwa ejele yeKhami ngo1976 waze wakhitshwa ngomnyaka ka1980 ngesikhathi ilizwe lithola inkululeko.

Wanikwa isikhundla sokuba nguDefence, Security and War Veterans Minister ngenyanga edluleyo. Wasebenza njengoMinister of State weNational security ehofisini kaMongameli ngomnyaka ka2015 kwaze kwayabamba oka2017. Wake waba njalo nguMphathintambo obona ngokwenzakala ekhaya kusukela ngomnyaka ka2002 kusiya ku2015.

URtd Gen Chiwenga wazalwa mhlaka 25 Ncwabakazi ngomnyaka ka1956 eHwedza endaweni yaseMashonaland East.
Wafunda esikolo seSt Mary’s Mission ngemva kokungena kwakhe kwezombangazwe eleminyaka engu-17. Ekungeneni kwakhe wathola imfundiso yobusotsha eZambia laseTanzania.

Emnyakeni ka1974 wanikwa isikhundla sokuba nguGeneral Staff weZanla wasekhutshulwa wabalilunga leZanla High Command enguMsekeli kaCommissar ngomnyaka ka1978.

Ngesikhathi sokumiswa kwempi uRtd Gen Chiwenga waphiwa isikhundla sokuthi abe nguye okhokhela iqembu elikhangela ngokuthula kwathiwa ayesebenzela eManicaland ngomnyaka ka1980 kwathi ekupheleni komnyaka wayasebenzela eMasvingo.

Waphiwa isikhundla sokuthi abenguBrigadier mhlaka 16 Mabasa ngomnyaka ka1981 kwathi umnyaka ungakapheli wakhutshulelwa isikhundla waba nguCommander we-1 Brigade.

Ngomnyaka ka1984 waphiwa njalo esinye isikhundla waba nguCommander we-5 Brigade kwathi ngemva kwesikhathi waba nguBrigadier-General esebenzela eArmy Headquarters waze wayaphiwa isikhundla sokuba nguMajor-General esiba ngu-Chief of Staff (Administration and Quartermaster).

Esinye isikhundla wasiphiwa ngo1994 esokuba ngu-Lieutenant-General and Commander of the Zimbabwe National Army kubunjwa iZimbabwe Defence Forces.

Ngo2004 waphiwa isikhundla sokuba ngukhomanda weZDF.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds