uMthunywa
Arnold Ndlovu
INHLANGANISO ekhangela ngezokulima iZimbabwe Farmers Union (ZFU) ikhuthaza abalimi ukuthi balime inhlanyelo eqondileyo.
Intatheli yephephandaba likazulu ikhulumisane loNkosazana Bridget Masikasi ongu-Regional Co-ordinator wesabelweni seMatabeleland South eZFU uthe kuqakathekile ukuthi abalimi babelolwazi lomhlobo wenhlanyelo abazisebenzisayo nxa belima.
“Abalimi kufanele babelolwazi olugcweleyo ngemihlobo yenhlanyelo kanye lendawo abalima kuzo ukwenzela ukuthi bazi ukukhetha umhlobo wenhlanyelo ovumayo ezigabeni zabo ukuze bathole isivuno esihle,” kutsho uNkkz Masikasi.
Uqhubekele phambili uNkkz Masikasi esithi endaweni ezigoqela iMatabeleland kufanele abaimi bahlanyele inhlanyelo ye-hybrid ngoba isenelisa ukumelana lesimo somkhathi endaweni le.
“Kundawana zonke zeMatabeleland okuvame khona ukuba lezulu elilutshwana kumbe eliphuzayo abalimi kabasebenzise umhlobo wama-hybrid seeds.
“Sinanzelele ukuthi intanga ezinengi zivame ukuboliswa yikusilela kwezulu kodwa ama-hybrid ayahlala emhlabathini amile laloba izulu lililutshwane,” kulandisa uNkkz Masikasi.
Uqhubekele phambili uNkkz Masikasi esithi abalimi bangasebenzisi inhlanyelo abazigcinela yona ekhaya ngemva kokuvuna ngoba zingamili kuhle.
“Abalimi asibakhuthazi ukuthi basebenzise inhlanyelo engahlolwanga abayivunayo ngoba ingamili kuhle okungabangela ukuthi isivuno abasikhangeleleyo sibephansi.
“Inhlanyelo ethathwa esiphaleni kungenzeka ukuthi ibe siphehliwe ngakho inhlanyelo ephehliweyo ayandisanga ukwenza kuhle ekumileni,” kutsho uNkkz Masikasi.
UNkkz Masikasi uphinde waxwayisa abalimi ukuthi ifethalayiza layo bayisebenzise ngezilinganiso eziqondileyo ukuze ingabulali izilimo.
“Abalimi kufanele bafake ifethalayiza ngesikhathi esilungileyo ezilimeni njalo elingeneyo ukuze bavikele izilimo zabo ngoba nxa ingathelwa ngendlela engaqondanga ingaphambanisa ukukhula kwezilimo okungabangela ukuthi umlimi athole isivuno esincane,” kuphetha uNkkz Masikasi.
