Uvuma iphutha lokugcina uBilliat

Uvuma iphutha lokugcina uBilliat

0 96
UKhama Billiat

Yintatheli kaMthunywa
IPHINI lomqeqetshi weMamelodi Sundowns, uManqoba “TV” Mngqithi livuma iphutha elenziwe liqembu ngokugcina isibabuli somdlali uKhama Billiat esitshiyayo.

Inkontileka kaBilliat leSundowns iyaphela ngoNhlangula ngomnyaka ozayo. UPitso Mosimane olekelelwa nguMngqithi usephumele obala ngokuthi lo mdlali uyahamba.

Exoxa labezindaba ngesikhathi kwethulwa iMzimkhulu Sports Against Crime Soccer Tournament ngoMgqibelo, uMngqithi uvule isifuba ngakholwa ukuthi bekumele kwenziwe yiSundowns ngoBilliat lezinye izibabuli zeqembu.

“Uma abadlali sebenqobe zonke izicoco kufanele ubadedele. Uma uke wayifunda incwadi yama-All Blacks ebizwa nge-The Legacy (iyakuveza lokhu). Into enhle eyokubadedela ukuze uqale kakutsha. Lokho kwenza ukuthi uqale ngeqembu elitsha elilambele impumelelo. Uma ugcina iqembu elifanayo ngethemba lokuzuza izinto ezifanayo isikhathi esinengi akusebenzi. Noma kungathiwa ulekhono elingakanani kodwa uyadinga into ezokuvuselela ikwenze ufune ukuzuza impumelelo. Yilapho umfutho omutsha oqhamuka khona. Uma uleqembu elilambileyo kulula ukuzuza izinto noma kungathiwa awubophele iqembu lezibabuli,” kutsho uMngqithi.

ISundowns ayizange iwine lutho kuPremier Soccer League ngesizini edlule ngaphandle kokuphakamisa isicoco seChampions League neseSuper Cup.

“Njengamanje sileqembu elifanayo leqembu elisiwinele izicoco ezinengi. Silahlekelwa yizicoco ngalo leli qembu.

Lokho kumele kukucacisele. Awukwazi ukuba leqembu eliwina iligi, iCaf Champions League, Caf Super Cup, Nedbank Cup leTelkom Knockout kodwa bese lelo qembu elifanayo lisehluleka ukuphinde liwine lezi zicoco. Kwenza ubulungiswa ukunika abanye abadlali ithuba lokuba ngoBilliat, Anthony Laffor loThemba Zwane bangomuso.

Angitsho ukuthi kumnandi noma kuhle ukulahlekelwa ngabadlali abamqoka kodwa ngizama ukuveza ukuthi kuyingozi kangakanani ukugcina abadlali ababodwa asebeke bazuza yonke into. Ngokwami ngemva kokuwina iChampions League ngangizomdayisa uBilliat, Themba Zwane labo bonke abadlali bami abayizihlabani bese ngiqala kutsha,” kutsho uMngqithi.

UBilliat ukhonjwa phetsheya kwezilwandle yize kuvela lokuthi iKaizer Chiefs isiqaphile isimo sakhe.

“Njengamanje ngeke sibadayise ngemali enhle. Sekulesikhathi bengawini lutho kodwa ukube sabadayisa ngesikhathi siqeda ukuwina inqwaba yezicoco ngabe senza imali enhle. KuKeagan Dolly sathola imali engaphezu kuka-R28 miliyoni,’’ kutsho uMngqithi.

SIMILAR ARTICLES

NO COMMENTS

Leave a Reply