uMthunywa
Nkosilathi Sibanda
UMSEKELI kamgcinisihlalo weZimbabwe Football Association uOmega Sibanda usecele ikhansili yakoBulawayo ukuthi ilungise inkundla elodumo lokubumba ithalenta lenguqu koBulawayo eyeNdola elokitshini leMinyela.
Inkundla yeNdola iyisikwakwa kodwa idume kakhulu ngokuba likhaya labadlali abanengi abenza amabizo abo batshiya imbali enhle kunguqu. Ngaphandle kwalokhu, iNdola Stadium ilikhaya njalo lethalenta likanobhutshuzwayo elikumaligi phansi edolobheni lakoBulawayo.
Loba udumo lwalinkundla lubatshazwa, isimo sayo asithabisi ngoba ikhanya iligceke elingalamnikazi nanko phela ababukeli bebhola baswela indawo yokuhlala. Izambuzi eziseceleni kwenkundla azisebenzi. Ngesikhathi sezulu amathimu afisa ukudlala inguqu yobungane athwele nzima ngoba inkundla iyagcwala amanzi.
USibanda njengomkhokheli wenguqu kuleli uzibonele mathupha ukuthi udumo lokuqakatheka kweNdola Stadium selwehlile.
Umphathi lo ubengumhlonitshwa omkhulu kumqhudelwano kaJoseph Tshuma Tournament obuqhutshelwe eNdola Stadium ngeSonto edluleyo.
UJoseph Tshuma ngummeli welokitshi lePhelandaba-Mpopoma edale lePhalamende.
Kumidlalo le bekulezikhulu zekhansili yakoBulawayo uManjinela uSimela Dube loDictor Khumalo okhokhela ugatsha lwezindlu ekhansilini.
Esethula umbiko wakhe kulumqhudelwano, uSibanda uthe kumzwisa ubuhlungu ukuthi lakhathesi, ngemva kweminyaka eminengi, iNdola Stadium iligceke lesikwakwa.
Ngemva kokuzwa ngesimo salinkundla, uSibanda uyibekile indaba yakhe kuziphathamandla zekhansili.
“Silazo izikhulu zekhansili yakoBulawayo ngakho sicela ukuthi ikhansili ilungise inkundla le. Akufakwe i-lawn lapha, kulungiswe lezambuzi. Lokhu angeke kwehlule ikhansili kuceciswe lindawo ibenhle, ifanele inguqu.
“Sihlangene lapha enkundleni yeNdola Stadium, inkundla esikhiphe abadlali bohlonzi asebedlalele amaqembu amakhulu kuleli,” kutsho uSibanda.
Inkulumo kaSibanda le iza ngesikhathi inhlanganiso yeZifa iphezulu kokuphakamisa umphakathi ngokusebenzisa umdlalo wenguqu. Ukulungisiswa kwenkundla eziyisikwakwa ezifana leNdola Stadium kubonakala kuyiyo indlela yokuhuga abasakhulayo kulumdlalo.
USibanda uthe nxa inkundla zingafana lezinye ezisetshenziswa ngamathimu akuPremiership, kuzabonakala ukuthi kuzaphuma ithalenta elimangalisayo kumdlalo wenguqu.
Kusenjalo uSibanda usekhuthaze abadlali abakumaligi aphakemeyo ukuthi batshiyane lomkhuba wokudlala inguqu yokubheja leyobungane.
“Abadlali abakumathimu akuPSL abatshiyane lokudlala imidlalo yokubheja leyobungane. Abavunyelwa kumidlalo le yilabo abaphezulu kweminyaka engu-30 yokuzalwa. Ngithi tshiyanani lakho ngoba singabopha umthetho wokuthi labo abaqhubeka bedlala kumidlalo le baxotshwe kunguqu.”
