Ayihlabi Ngakumisa: P Ndebele

30 Nov, 2017 - 02:11 0 Views

uMthunywa

Silo C Dube kugwalo
Lamhlanje udaba lwethu siluqala lapho esicine khona kuviki ephelileyo, oMaKhuphe loMaNsingo izalukazi ezabelethisa uMaNdlovu, umkaSwabide Khumalo, aze azale umntwana okhubazekileyo. Khumbula mfundi ukuthi omama laba bona babenze isinqumo sokuthi leyongane idluliswe, ngoba ingafanelanga kuphila.

UMaNdlovu wayekwalile lokho kanti lomkakhe uSwabide ngalesosikhathi wenza isinqumo ayesifisa wathi umntwana uzaphila. UKhumalo wababhadala indleko zabo ezijayelekileyo esintwini nxa kwenziwe umsebenzi onjalo. Njengoba ukuzalwa komntwana oyisilima kwakuthathwa njengehlazo, uKhumalo wafisa ukuthi lokho kungazekwazakala ebantwini abanengi phandle komuzi wakhe. Wabapha isivalamlomo ukuthi bangaze bahamba beyifafaza leyondaba oMaKhuphe loMaNsingo.

Wayaphambili ebathembisa ukubenzele okunye okungcono nxa babezagcina leyo mfihlo bengatsheli muntu.

Sikufundile ngaphambili ukuthi omunye wabomama laba wehluleka ukuyigcina imfihlo leyo wayichathekela omunye wababalisi uNkomo owayefuna ukuyibhadlaza emphakathini. OMaKhuphe lo MaNsingo sebethatha lokho uKhumalo ayethe uzabanika khona bengagcina imfihlo yomuzi wakhe njengeholo.

OMaKhuphe loMaNsingo sebecabanga ukuyazibuzela imbadalo yabo ngoba kukhanya uKhumalo kasafuni lezinto zabo. UMaNsingo yena usegcona abantu abafundileyo ukuthi bangamaqili. Uqhubeka ethi uKhumalo uzama ukuzitshaya isihlakaniphi, sona kanye isikhwehle sakoGasa esiphanda umumbu ngongonyezi. UMaKhuphe uyasonga ethi nxa kuyikuthi unjalo uKhumalo wayefikile esipampulekini.

Uyesatshwa uKhumalo yikho uMaNsingo ebuza uMaKhuphe ukuthi uzamenzani enguye nje? UMaNsingo uthi kuthiwa uKhumalo kabhodwa okutsho ukuthi usebenzisa imithi yokuloya aze akufakaze ngokuthi wabalesibindi wadela ukusebenzela emangweni wakibo khonale kuGwayi ezothathela abantwababo isikhundla. Uzimisile kuqhinga labo uMaKhuphe ngoba uphendula omunye wakhe ethi angaphela abaloye ngoba nguye uKhumalo owayebathembise ukuthi wayezabanika futhi imali enengi uma bengatshelanga muntu ukuthi umfazi wakhe umzalele isiyelele esingenziyo.

Abathembekanga omama laba ngoba ukhona phakathi kwabo owaye sekhuphe imfihlo leyo kodwa balokhu befuna imbadalo kuKhumalo angathi bayimbokotha indaba leyo. Kwakumele omunye wabo aliveze iqiniso lokuthi behlulekile ukugcina isithembiso leso. Kubasobala ukuthi uMaKhuphe nguye ongagcinanga isithembiso phakathi kwabo loKhumalo ngoba uMaNsingo ukhuluma ngamandla ukuthi bona basigcinile isithembiso.

Uqhubekela phambili ethi nxa uKhumalo etshinga ebaxotsha babezamtshela ukuthi bona imilomo yabo isivuleka angakhali ngabo kusasa. Uyaphambili ethi ukufa komuntu yimbodlela mani! Nxa ethi uyabalwisa bazamembulela akhawule. UMaKhuphe engabe eqondile kumbe njalo uvale iphutha lakhe lokwehluleka ukuvalela udaba lokuzalwa kwesilima koKhumalo esifubeni sakhe ubuya lombono kuMaNsingo ukuthi bekungaba njani bathume omunye umuntu wesilisa ayebafunela okungokwabo.

Uthi uKhumalo uzahlonipha ukutshingela enye indoda ngoba bangahle baqwaqwazane nxa eyiphoxa. Kakuboni kuqondile ukuthi mayemhlasela bona mathupha. UMaNsingo ubonisa uMaKhuphe ukuthi lokho akulunganga ngoba eyababili ngeyababili. Ngalawo magama kambe indaba zomuzi kaKhumalo zizahlala zivalekile na zona zisaziwa ngabantu abambalwa?

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds