uMthunywa
BAKAMALANDELA angithi nje limqoka elithi okhalileyo uzwakele ngakho kule iviki sizaphatha indaba mqoka eyokuthuswa kwezifuyo njengoba nje inengi lihlala liyililela. Yebo kambe bathi inengi liyona ububende kodwa nje kuyaziwa ukuthi izandla ezinengi zilendima njalo isililo sentandane ezinengi siyezwakala.
Ngokunjalo udaba lokuthuswa kwezifuyo lumqoka nje nanko phela uzulu uhlala elulilela. Okunye yikuthi lesisisikhathi yiso okuthuswa khona izifuyo ngoba phela seziguqule amadlelo sezisidla eguswini njengoba sokuyisikhathi sokulima funa zilobise izilimo.
Ngokunjalo nxa sezisidla eguswini yikho phela ezihlangana khona lezinye inkomo ezivela endaweni ezehlukeneyo zidinga uhatshi. Lapha ke kuvamile ukuthi kube khona eziyabe zithuswe ngendlela ewisela ezinye inkanda yikho nje oNdukuzibomvu bakukhaliphela lokhu ngokuthusa inkomo zabo mathuba wonke nxa ziguqulwa amadlelo.
Ngokunjalo minengi imihlobo yemthuso njalo isebenza ngendlela ezehlukeneyo kusiya ngokuthi yiwuphi wakhona.
Kukhona umthuso odala ukuthi inkomo itshaye kakhulu esikalini nxa ithengiswa kubuye njalo kube khona edala ukuthi inkomo zakhona zizale kakhulu kumbe zibe lochago olunengi. Ngalokhu abantu bathusa ngenjongo yokuthi inkomo zabo zibenzele lokho abakuthandayo.
Lakulezinsuku bakhona abasakholelwa ekuthuseni izifuyo noma nje bebalutshwana. Umthuso wakuqala othandwa ngabalimi abanengi ubizwa ngokuthi ngowemvubu. Waphiwa leligama ngoba kusetshenziswa kakhulu amafutha kanye lesikhumba semvubu nxa uthusa ngawo.
Okwenza inkomo zithuswe ngemvubu yikuthi ilomzimba omkhulu kakhulu njalo kayicaki. Ngalokhu kukholelwa ukuthi umuntu engathusa inkomo zakhe ngomthuso lo zizakuba zinkulu njalo zihlale zinonile zingaze zawiselwa ngezinye inkanda kumbe zingagulaguli.
Kunengi phela okuhlanganiswa lemvubu le nxa kuthuswa njalo zinengi indlela zokuthusa ngaloluhlobo. Umnisibaya angazenzela lokhu kumbe adinge omunye umuntu amthusele nxa kuyikuthi kakwazi. Othusayo uzathatha isikhumba semvubu, amafutha ayo, ifutha kanye lesiphaqa sempofu, umthunzi wesilwane, izikhukhula zomfula kanye lezinye izihlahla engingeke ngazibetha ngegama. Kungahlanganiswa lokhu kuzahlala ngaphandle komuzi okwamalanga ababili.
Kuzakuthi ngelanga lesibili ntambama inkomo sezisesibayeni onguye othusayo athathe umtshaqana wakhe weziphunzi lezi aqonde esibayeni elabomdeni abangamadoda. Esibayeni lapha kuzabaswa owekhanka ngenkuni zombambangwe. Ngalesisikhathi uzathatha umkhonto wesibaya awufake emlilweni lo uze ube bomvu gebhu qede awukhiphe agwaze ngawo esangweni lesibaya utshone ntwa.
Engakwenza lokhu uthatha njalo amalahle ngodengezi angene lawo esibayeni afike phakathi athi vo iziphunzi lezi kuthunqe intuthu kwesabeke. Kusenjalo athathe amanye amalahle awafake njalo imithi le ayewathi qithi esangweni lesibaya eceleni komkhonto lo.
Kuzathunqa ke intuthu uthole inkomo sezimise amakhanda ziyiphembela. Ngemva kwalokho uzathatha amalalangwenya esiziba esingacitshiyo afake iziphunzi lezi aphunge isibaya sonke ngehlahlana esihlahla esithiwa yingobamakhosi.
Ngemva kwalokho bazasuka ke bonke laba baqonde ekhaya batshiye izanzoco lezi zinjalo esibayeni, kuthi ekuseni ilanga lingakaphumi bavukele khona othusayo lo ayegebha lapho abefake khona amalahle la awagqibele khonapho.
Nxa othusayo engumuntu wemzini uzatshiya ezinye iziphunzi lapha anike umninisibaya ukuthi athunqisele inkomo kanye ngesikhathi zingena amahlanga langesikhathi kuqalisa ihlobo. Lokhu kuzakwenziwa minyaka yonke njengeminye imithuso.
Nxa sokwenzakele kanje inkomo zakhona zizahlala zinonile bakithi kuthi noma uyikhangele ufuna ukuyithenga uzizwe uvuma ukuyithenga noma ithengiswa ngentengo ephezulu. Inkomo zomuntu ozithuse ngaloluhlobo akuvamanga ukuthi zihlaselwe yimikhuhlane etshiyeneyo ngoba imvubu lempofu kazandanga ukuthi zigule.
Okunye njalo umthuso lo wenza ukuthi izibanda zingaze zahlasela izifuyo lezi ngoba kukholelwa ukuthi ziyabe zihlala zicatshile ezibandeni zilentelezi. Kusenjalo umthunzi wesilwane wenza ukuthi inkomo yakhona isilwane siyibone njengesinye saso kuthi ezinye izibanda ezinjengempisi zizwe ziyesaba njengesilwane.
Kukhona njalo umthuso wendwangu kumbe owenkawu kodwa akuvamanga ukuthi abantu bawujabulele kakhulu umthuso lo. Okokuqala lumthuso udala ukuthi inkomo zizale kakhulu kodwa ziyabe zihlala zicakile njalo zihamba kakhulu nxa zisemadlelweni. Kusenjalo umthuso lo wenza ukuthi inkomo zakhona zibe lochago olunengi kakhulu kodwa ziyawisela eminye imhlambi inkanda.
Kukhona njalo umthuso wegogo ohlanganiswa lenkakha. Lo ke uhlupha ngokuthi akuvamanga ukuthi izinyamazana lezi okuthuswa ngazo zibonakale kalula yikho nje bebalutshwana abantu ababethusa ngawo. Okuhle ngawo yikuthi inkomo zakhona zihlala zinonile kakhulu njalo amasela kanye lezibanda kaziziboni zingaze zizidinge njani. Kusenjalo inkomo ezithuswe ngohlobo lolu kazigulaguli noma kuqhamuke umkhuhlane bani ezifuyweni. Yikho ke abantu abanengi lakulezinsuku bewuthanda umthuso lo.
Kwakunjalo ke endulo kusagiywa ngoludala abantu babethusa inkomo zabo ngendlela ezehlukeneyo. Ngalokhu umthuso wemvubu lowegogo yayisetshenziswa ngabantu abalutshwane njalo abalenkomo ezinengi. Lokhu kungenxa yokuthi othusileyo wayebongwa ngenkomo ezimbalwa njalo babebalutshwane abawaziyo.
Olunye njalo ulwazi olujulileyo mayelana leminye imhlobo yemthuso sizalubekela amazolo bakaMthwakazi ngoba abadala bathi lingana kakhulu liyawutotisa umumbu.
-Ungaxhumana lomlobi ku 0775722298 kumbe ku whatsapp 0737771317.
