uMthunywa
SISAQHUBEKA ngokunanzelela izinto ezehlukeneyo eziyingxenye yokuhlabusa kolimi lwesiNdebele okuyilokho njalo okubuya ngezigaba ezitshiyeneyo.Umkhathi ngenye ingxenye eyayichasisa okunengi empilweni njalo abantu besintwini babewuhlahlula babuye njalo balandele ingcazelo ezitshiyeneyo ezazilokwelenza lempilo zabo,babephepha ,baphile bafunde njalo baqondise okusempilweni zabo ngokunanzelela umkhathi jikelele usezigabeni ezitshiyeneyo.
Kesikhangele amayezi:imilaza,la ngamayezi alombala okhanyelayo,wona ke ayechaza ukuthi izulu lalingathwala mhlalokho njalo kube yileliyana elibanekayo,eliphazimayo,izulu lingekani amayezi ayebuthana phezu kwemilaza yikho babesithi liyabuthelela kuhle kucace ukuthi lalizakuna mhlalokho.lokhu kwakubanika ithuba lokulungiselela ukubuya kwalo kwakuthi lowo owaylo hambo ahle aguqule lenhlelo zakhe esebone n je ukuthi lingamvalela endleleni lapha.
Lanxa kulezinto ezifuna ukulungiswa ezifana lezivalo babehle balungise lifike nje into yonke ilungile.
Amathumbu entaka:lo umhlobo wamayezi ujiyile nxa ufananiswa lemilaza.wona abonakala sengathi adalwe njengenkobe abuye abe lamahilihili .amayezi nxa emanengi kuyisibonelelo sokuthi izulu liyabe likhona ngalowo mnyaka,abantu babehle badinge inhlanyelo eyaneleyo balungiselele ukulima.
Amaxhegu :la ngamayezi athe gqa gqa esibhakabhakeni lapha.ngesikhathi ebonakala esibhakabhakeni kwakuthiwa abiza izulu kodwa nxa sekuntambama angachitheka kwakucaca ukuthi izulu lalo laselichithekile,kwakuthanda kulalwe elokhu ebuthene yiyo endlela eyayinika ithemba ukuthi izulu liyeza.
