uMthunywa
Gladmore Ncube
SOLUDALE ingxabano uthando lomunye u-sugar mama loBen 10 wakhe nanko phela unina kaBen 10 ufunga agomele ukuthi umntanakhe ngeke athathe isalukazi yena esaphila.
Uthando lukaMnumzana Tafadzwa Muhenga (21) loNkosikazi Nontokozo Mlilo (31) abahlala elokitshini leNkulumane 5 edolobheni lakoBulawayo soludale ukungezwani lonina uNkosazana Pretty Mthethwa.
Intatheli ivakatshele kule indawo yakhuluma loMnumzana Obrien Ncube wakule indawo oveze ukuthi unina kaMuhenga udla amalahle ngendaba yokumithiswa kukaMlilo yindodana yakhe eleminyaka engaphansi kweyakhe ngelitshumi.
“Unina kaMuhenga kafuni lakuzwa ngokuthi umntanakhe wamithisa isalukazi esinguMlilo ngoba emdala kakhulu kulaye.
“UMlilo ngakolunye uhlangothi laye akumphathi kuhle ukuthi uninazala ufuna ukumehlukanisa lejaha lakhe alithandayo njalo uzithwele umntanabo. Kungakho bathi sebexabene uMlilo wayaphosa amatshe phezulu kwendlu kaninazala ebusuku belele esithi ufuna indoda yakhe,” kuchaza uMnu Ncube.
Intatheli yenelise njalo ukukhulumisana loNkszn Mthethwa yabuzisisa ngaloludaba waveza ukuthi kuliqiniso ukuthi akula kuthula empilweni kulandela indaba ka-sugar mama.
“UMlilo ungiphatha kubi ngoba uthandana lecinathunjana lami ngaphandle kwemvumo yami ngithi ngibehlukanisa ale akhethe ukulwa lami athi uyamfuna ngenkani aphose amatshe phezu kwendlu ebusuku.
“Okunye njalo angisaphili kuhle ngoba selezinyanga ehlala engithethisa phambi kwabantu engenza umuntu omubi esithi mina ngilomoya omubi angifuni ukumekela athandane lejaha lakhe. Angisela kuthula empilweni yami ngenxa yakhe,” kuchaza uNkszn Mthethwa.
Intatheli ikhulumisane njalo Nkszn Mlilo othe ngamanga ukuthi ulwa loninazala uhlupho nje yikuthi uninazala ufuna ukumehlukanisa lesithandwa sakhe.
“UNkszn Mthethwa watshela umntanakhe ukuthi ehlukane lami njalo wamvalela endlini ukuze angabonani lami ngoba esithi ngimdala kakhulu laye ngoba ngileminyaka engu-31 yena uleminyaka engu-21. Umamazala wayengithuka esithi ngizathelela umntanakhe umkhuhlane ngakho kangehlukane laye.
“Yena angakwaziyo yikuthi mina lomntanakhe siyathandana njalo asilazinkinga okusihluphayo yikuthi unina uma phakathi kwethu kuphela,” kulandisa uMlilo.
UMthunywa uzwe njalo ukuthi uNkszn Mthethwa wathatha indaba le wayisa emthethwandaba eWest Commonage lapho umantshi afika wamsekela wathi uNkszn Mlilo engaze walugxoba njalo endlini kaMthethwa ezomhlupha.
UNkszn Mlilo ebuzwa ngalokhu uthe balungisa lindaba lesithandwa sakhe njalo bayavumelana ukuthi unina nguye obehlukanisayo.
“Indaba le siyilungisile lesithandwa sami yikho nje sakhetha ukuthi sizihlalele sodwa singayi emthethwandaba ngoba siyathandana,” kuchaza uNkszn Mlilo.
Intatheli yenza njalo imizamo yokukhulumisana loMnu Muhenga kodwa kwehlula ngoba wathi ebona intatheli isiza wacela enyaweni.
