uMthunywa
Cornelius Luphahla
KUTHUNQE uthuli lothudlana esikolo seMazwi Primary elokitshini leMagwegwe North lapho ababalisi bakulesisikolo ababhuqwe khona ngabazali ngemva kokuxotsha abafundi.
Impi le yenzakale ngoMvulo kuyonale iviki lapho ababalisi abathathu abavoxwe khona yizakhamizi zithi kungani bexotsha abantwabazo esikolo ngesikhathi bebhala imihloliso njalo behlawulile imfanelo zesikolo.
Kubikwa inengi labafundi laba abaxotshiweyo bebehlawulile imfanelo zesikolo okuyikho okudale ukuthi izakhamizi zitshaye ababalisi laba ababaxotshileyo.
UMthunywa uvakatshele kule indawo wakhulumisana loMnumzana Ephraim Mazibuko omunye wezakhamizi zakule indawo walandisa ngendaba le ethi imzwisa ubuhlungu kakhulu.
“Kwathi kusekuseni kwathutsha abantwabami ababili bethi baxotshiwe esikolo kuthiwa kabahlawulanga imfanelo zesikolo. Ngalesosikhathi ngahle ngahamba labo esikolo ngithwele ama receipts aveza ukuthi ngabhadala. Ngathi ngifika esikolo ngathola izakhamizi ezinengi zilethe abantwabazo abaxotshiweyo ngapho zibhadele.
“Ngesikhathi sibuza kubabalisi ukuthi baxotsheleni abantwabethu bona bebhadalile basiphendula kubi kakhulu okuyikho okwadala ukuthi sibatshaye. Okwakungizwisa ubuhlungu kakhulu yikuthi ngalesosikhathi abanye abantwana babebhala imihloliso ngapho abethu kababhali khonapho bebhadalile,” kuveza uMnu Mazibuko.
UNkosazana Elina Mafu ongomunye wabazali abalabantwana abafunde kule indawo uthe sokukanengi ababalisi laba bexotsha abantwabakhe ngapho ebhadalile.
“Ababalisi laba vele yinhlalo yabo ukuxotsha abantwabethu ngapho behlawulile imfanelo zesikolo. Mina ngikhuluma nje abami sokukathathu bexotshwa ngize ngiyebanika ama receipts kube yikhona bebekela.
“Sengize ngicabanga ukuthi ngibasuse abantwabami kulesisikolo bayefunda kwesinye ngoba ngeke baphumelela nxa behlala bephazanyiswa yikuxotshwa lokhu,” kutsho uNkszn Mafu.
Omunye umbalisi wakulesisikolo ongathandanga ukubethwa ngegama uthe abakhangela ngezimali zesikolo yibo abathi abafundi kabahlawulanga imfanelo zesikolo.
“Mina ngisola abakhangela ngokuhlawulwa kwemfanelo zesikolo ngoba yibo abathi abafundi kabahlawulanga.
Ngokunjalo thina ababalisi siyabe sithunywe yibo ukuthi sibaxotshe ngakho kufanele ukuthi izakhamizi zikhulumisane labo sibili,” kutsho umbalisi lo.
UMqondisi wezeMfundo edolobheni lakoBulawayo uNkosikazi Olicah Kaira ebuzwa ngale indaba uthe akuvunyelwa ukuthi abafundi baxotshwe esikolo njalo indaba le ubengakayizwa.
“Indaba yokulwa kwabazali lababalisi besikolo eMazwi Primary bengingakayizwa. Noma kunjalo umthetho wezeMfundo kawuvumeli ukuthi abafundi baxotshwe esikolo ngakho nxa bengakhiphanga imfanelo zesikolo ababalisi kufanele bakhulumisane labazali njalo bayakwazi lokhu,” kuphetha uNkkz Kaira.
