Uncategorized

Wehle esihlalweni uMugabe

23 Nov, 2017 - 02:11 0 Views
Wehle esihlalweni uMugabe UKhomuredi Robert Gabriel Mugabe

uMthunywa

YiNtatheli kaMthunywa
EMHLABENI kusinwa kudedelwana, lesisaga sigcwaliseke ngesenzo sikaMongameli wakuleli osetshiye umsebenzi wokuba nguMongameli welizwe ngemva kokuba abebandla lakhe leZanu-PF bemxwayise ukuthi aphume esikhundleni.

ObenguMongameli welizwe uKhomuredi Robert Gabriel Mugabe wehle esihlalweni lesi ngoLwesibili kuyonale iviki ngesikhathi iqula leNational Assembly leleSenate lihlangene eHarare ngenhloso yokumethula esihlalweni ngemva kokubusa okweminyaka engu-37.

Isikhulumi seDale lePhalamende uAdvocate Jacob Mudenda uveze ukutshiya kukaMongameli umsebenzi ngesikhathi esemhlanganweni lo ngokubala incwadi elotshwe nguKhmrd Mugabe mayelana lokwehla kwakhe esikhundleni.

“UKhomuredi Jacob Mudenda wangazisa ngokuthi ngomthetho wesisekelo sombuso kuSection 96 (1) (Amendment Number 20), 2013 abantu bakuleli balemvumo yokuthi nxa bengasangifuni ngehle esihlalweni. Ngalokhu lamhlanje ngilandela isisekelo sombuso ngiyehla esihlalweni sokuba nguMongameli webandla leZanu-PF kanye lowelizwe leZimbabwe.

“Ngokunjalo okwenze ngakhetha ukutshiya umsebenzi wokuba nguMongameli yikuthi ngifuna abantu bakuleli baphile ngokuthula kungelabudlwangudlwangu. Ngokunjalo isisekelo sombuso wakuleli ku Section 96 (1) sithi uMongameli kumbe umsekeli wakhe nxa abantu bengasamfuni kufanele atshiye umsebenzi kungakeneli amahola angu-24 njalo abhale incwadi yokutshiya,” kutsho uKhmrd Mugabe.

UMudenda uthe uzulu alindele uMongameli omutsha kungakedluli usuku olulodwa.

“Isisekelo soMbuso wakuleli sithi Isikhulumeli seNational Assembly kufanele sethule uMongameli omutsha kuzulu ngokusemthethweni nxa kuphume omunye ukuze ilizwe liqhubekele phambili. Ngokunjalo uzulu kalindele ukwethulelwa kukaMongameli omutsha,” kutsho uKhmrd Mudenda.

Ukwethulwa kobenguMongameli wakuleli uKhmrd Mugabe kujabulise uzulu wonke wakuleli ikakhulu emadolobheni agoqela iBulawayo, Harare, Masvingo kanye lakwezinye indawo.

KoBulawayo abantu kade begijima indawo yonke baze bayakuthi gwaqa esithombeni sowayenguMsekeli kaMongameli umuyi uKhomuredi Dokotela Joshua Mqabuko Nkomo okuyikho abafike bahlabela khona ingoma zempi yenkululeko bechaza ukuthi umuyi wasebenza nzima kakhulu ngesikhathi soMvukela.

Omunye wezakhamizi ezihlala phakathi kwedolobho lakoBulawayo uMnumzana Owen Ndlovu ubikele intatheli ukuthi uthabe kakhulu ngokwehla kukaKhmrd Mugabe esihlalweni.

“Mina ngiyajabula kakhulu ngokwehla kukaKhmrd Mugabe esihlalweni njalo ngilethemba lokuthi sengizawuthola umsebenzi. Ngitsho ngoba ngileDegree kanye leMasters’ Degree kodwa kangisebenzi.

“Ngokunjalo ukwehla kwakhe esihlalweni kimi kuyikunqoba njalo ngiyambonga ngokukhokhelwa kwakhe ilizwe okwenzileyo. Okunye njalo ngilethemba lokuthi ozathatha isikhundla lesi uzasebenza ngobuqotho ngoba esebonile lapho obekuphambaniseka khona,” kuphetha uMnu Ndlovu. — Chronicle

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds