uMthunywa
Nkosilathi Sibanda
KUYACACA ukuthi umqeqetshi weHighlanders uErol Akbay uzabuyela kibo kumalanga ambalwa alandelayo ngoba isizini isibanga emaphethelweni.
UAkbay wabika phakathi komnyaka ukuthi kasoze avuselele isivumelwano sakhe leHighlanders ekupheleni kwesizini.
Sesifikile isikhathi sokuthi akhululwe amajogwe kungene umqeqetshi omutsha.
Abaphathi beqembu lokhu bengela muntu ozathatha umsebenzi kaAkbay njalo uMthunywa ubika ngokugcweleyo ukuthi iqembu lizakuya kukhefu likaMpalakazi lingela olikhuzayo.
Umbiko ofihliweyo otholwe yintatheli uveza ukuba umaqhuzu weqembu uNhlanhla Bahlangene Dube akalawo amandla okufaka umbiko wokuthi badinga umqeqetshi ngalesi isikhathi.
Loba sekugcwele kuboWhatsApp lakuboFacebook ukuthi iBosso isenkingeni, izolo uDube ulandele yonke imibiko le wathi iqembu alizwa ubuhlungu ngokuthi uAkbay uyahamba.
“Le yinto esihlezi siyazi ukuthi umqeqetshi uzatshiya iqembu. Sizenza konke ukuthi sidinge umqeqetshi kuzwa umnyaka lo ungakapheli,” kutsho uDube.
UMthunywa uvakatshele enkambeni lapho okulolonga khona iHighlanders. UAkbay uthe kazisoli ngokubika ukuthi uyatshiya.
“Ngiyayithanda iZimbabwe. Leli lilizwe lenguqu njalo kumnandi ukusebenza lapha. Angizisoli ukuthi ngeza lapha ukuzoqeqetsha iHighlanders kodwa isinqumo ngasenza esokuthi ngehlukane leqembu leli.”
Banengi abaqeqetshi abacatshangelwa ukuthi bazaqhatshwa endaweni yami.
UAkbay uphenduka enkundleni lamuhla ezodibana leHow Mine. Kulumdlalo kuzavela ukuthi umqeqetshi uhloseni kumidlalo yakhe yokucina.
Udletshana olusondelele uMthunywa luveza ukuba uAkbay udabuke kakhulu ngokulahlekelwa ngabadlali engazi kulisizini.
Pho izahlohlelwa ngubani ozavala isikhala salumqeqethsi ngesizini ezayo? Lo ngumbuzo ovela kubalandeli ababona angathi iBosso izathwala nzima ngo2018.
Ukudingisisa kwephephandaba likazulu kuthole ukuba kulequla labalandeli balithimu abafuna ukuthi kuphenduke uRahman Gumbo.
Umaqhuzu uDube uthe yonke into ihlangane eqenjini.
“Ukusuka komqeqetshi akutsho ukuthi iqembu selibhudlukile.
“Umqeqetshi uyazi ukuthi umsebenzi wakhe kuhle ngakho siyamethemba ukuthi uzakuba lamacebo okutshiya iqembu lihlangene,” kutsho uDube.
