uMthunywa
Arnold Ndlovu
INHLANGANISO yeVeterinary Services ikhuthaza abalimi ukuthi baqaphele njalo bavikele izifuyo zabo emkhuhlaneni wokuphunza ngoba uyingozi enkulu ezifuyweni ezifana lembuzi.
Ekhuluma loMthunywa uDokotela Khulekani Sibanda weVeterinary Services uthe abalimi kufanele behlale bezilungiselele ukuvikela izifuyo zabo emkhuhlaneni lo.
Uthe umkhuhlane wokuphunza ungabangelwa yizibungwana kanye lamagcikwane atholakala ekudleni kanye lemanzini
“Umkhuhlane wokuphunza ngumkhuhlane obangelwa yizinto ezinengi ezehlukenenyo ezigoqela izibungwana kanye lamagcikwane (viruses). Umkhuhlane lo ubangelwa yindlela ezintathu kodwa ovame ukubangela ukuphunza yi-Chlamydia abourtus.
“Nxa kungaba lembuzi eyodwa esihlaselwe ngumkhuhlane we-chlamydia abalimi bakhuthazwa ukuthi bahle bahlabe ezinye imbuzi ijekiseni yokuzivikela emkhuhlaneni lo kanye lokuyehlukanisa lezinye,” kutsho uDkt Sibanda.
Kubikwa imbuzi ehlaselwe ngumkhuhlane lo (Chlamydia) iphiwa i-vaccination ebizwa ngokuthi yi-oxytetracycline kumbe i-Bio Mycin sekusele amaviki amane kusiya kwayisithupha ukuthi izale.
Wengezelele wathi amanzi lawo alakho ukubangela ukuphunza embuzini.
“Amanzi lawo alakho ukubangela ukuphunza embuzini ngoba ayabe engcolile. Lokhu ukuphunza kwembuzi kubizwa ngokuthi yi-listeriosis. Lo umkhuhlane ubangelwa yikudla inhlabathini elePH ephezulu kanye lokunatha amanzi alezibungwana ze-salmonella typhinmunin. Imbuzi bengazivikela ngokufaka umuthi obizwa ngokuthi yi-chlortetracycline ekudleni kwazo ukuze kumiswe i-listeriosis,” kutsho uDkt Sibanda.
UDkt Sibanda uthe elinye igcikwane elibangela ukuphunza ezifuyweni ngele-Queensland fever (Q fever). I-Q fever ilakho ukuthelelwana phakathi kwezifuyo ezigoqela izimvu, inkomo, izinja kanye labantu.
“Imbuzi zilakho ukuhlaselwa ngumkhuhlane we-Q fever ngokudla emadlelweni angahlanzekanga kanye lokulunywa yimikhaza. Imbuzi ezihlaselwe ngumkhuhlane lowu azitshengiseli ukubakhona komkhuhlane lowu kuze kufike isikhathi lapho imbuzi isizala okubonakala kuzelwe izinyane elifileyo.
UDkt Sibanda uphethe ngokuthi abalimi nxa bencedisa imbuzi esiphunzile kufanele bagqoke ama-gloves ukuze bazivikele njalo aamzinyane azalwa efile kumele angcwatshwe kumbe atshiswe.
