uMthunywa
Umkami kakwazi ukuthi ngake ngathengisa umzimba
NGICELA ungisize Khulu. Ngisanda kutshada lomkami ongumzalwane. Akazi ukuthi bengingaziphethanga kuhle ngaphambi kokuhlangana laye. Ngenxa yokuhlupheka kwangakithi ngaze ngathengisa ngitsho lomzimba iminyaka embalwa ukuze ngiqede isikolo. Ngitsho lasekhaya abayazi lempilo ebengiyiphila phambilini.
Manje angazi ukuthi ngimtshele ngale mpilo yakudala. Kuzakwenzakalani yena angabakwazi ngakho? Unembeza uyangibulala ngoba ngiyamthanda kakhulu kodwa ngilovalo lokuhlala lendaba engaka.
Impendulo:
Mzukulu iqiniso liyakhulula loba libuhlungu kangakanani. Kuhle ukuthi uyabona ukuthi kubalulekile ukuthi umtshado wakho uwakhe esisekelweni okuyiso, iqiniso. Okuzakuba buhlungu yikuthi umkakho azitholele yena ukuthi umfihlele ingxenye yempilo yakho engaka. Nxa kungamjabulisi lokhu umkakho ekuqaleni kodwa kungcono kakhulu kulokuthi ezwe ngabantu wena njengonkosikazi wakhe ungasibonanga isidingo sokumtshela. Njengomkakho uzakuxolela. Kodwa wena uzabe ulibeke njengoba linjalo iqiniso.
Umkami udakwa azikhohlwe
Ngithemba uphilile Khulu, unkosikazi wami uyasebenza kodwa mina angisebenzi. Silomntwana oyedwa. Inkinga yikuthi utshwala buyamala. Udakwa angalali endlini athi ulele kubangane bakhe. Sengimkhuze ngaze ngadela.
Inkinga enkulu yikuthi ngisamthanda. Angisazi ukuthi ngenzenjani.
Impendulo:
Ukudakwa kakhulu yikugula. Kayisiyo nto ongayibona njengento encinyane. Kubaluleke kakhulu ukuthola ukuthi kungani unina wengane yakho esebenzisa utshwala kubi. Udinga usizo umkakho mzukulu endabeni yotshwala. Nxa ukukhuluma kungamsizi kutsho ukuthi utshwala buyamala. Lawe njengendoda kumele wenze konke okusemandleni akho ukuthi ulethe imali ngekhaya. Kungenzakala ukuthi umkakho unatha utshwala kakhulu ngoba wena kawumncedisi.
Ngimithise umfazi engingamthandiyo
Usisi engithandana laye usekhulelwe. Inkinga yami yikuthi angimthandi loba ngizama ukukufihla lokhu, ngiyehluleka. Kodwa ngiyazi ukuthi yena ungithanda kakhulu, futhi ngiyazi ukuthi kungamlimaza kakhulu ukuthola ukuthi angizimiselanga ngaye. Ukuthi usezithwele kwenza isimo sibe nzima kakhulu. Angazi ukuthi ngenzenjani.
Impendulo:
Ukuthandana lomuntu aze azithwale usazi ukuthi awumthandi akusinto encinyane. Kubi mzukulu lokho okwenzileyo.
Ukuletha umphefumulo ongelacala emhlabeni ubususithi umama womntwana awumthandi ekucineni kuyinto embi.
Wawudlalelani ngaye? Khathesi sekuzakuba lomntwana ezokhula lomzali oyedwa ngezizatho zobugovu.
Okubalulekileyo yikuthi ungabe usaqhubeka udlala ngengane yabantu ngaphezu kwalokho osukwenzile.
Kumele uphumele egcekeni alazi iqiniso. Ngiyazi ukuthi akusoze kube mnandi ukwazi ukuthi umuntu omthandayo yena akakuthandi kodwa kungcono kulokuphila impilo yamanga.
