‘NguSathane ongenze ngatshontsha ibhayisikili’

‘NguSathane ongenze ngatshontsha ibhayisikili’

0 440

Thando Dube
“NGANGINGAZENZI, ngenziwa yimimoya emibi. USathane nguye owangisebenzisayo ukuthi ngitshontshe ibhayisikili.”

La ngamazwi kaPrince Munatsi obemiswe emthethwandaba weWestern Commonage koBulawayo esetheswa icala lokutshontsha  ibhayisikili.

Umtshutshisi kulelicala uNkosazana Memory Ndlovu ubikele inkundla ukuthi mhlaka 24 Nhlolanja kuwonalo umnyaka umsolwa uMunatsi  oleminyaka yokuzalwa engu-24 loMoses Chipunza oleminyaka engu-26 yokuzalwa abahlala elokitshini leCowdry Park batshontsha ibhayisikili likamamangala, uMnumzana Jabulani Gore elokitshini leNew Luveve.

Inkundla izwe njalo ukuthi ngemva kwenyanga lamalanga ambalwa mhlaka 7 Mabasa umamangala uMnu Gore wahlangana loMoreblessing Mherere esebenzisa ibhayisikili ananzelela ukuthi ngelakhe.

UMherere wathi ebuzisiswa ngendlela athola ngayo ibhayisikili waveza ukuthi walithengiselwa nguMunatsi loChipunza nge$20. Lokhu kwabangela  ukuthi umamangala ayemangala emapholiseni eLuveve okwenza ukuthi ometheswacala babotshwa.

Ebuzwa ukuthi uyalivuma icala aletheswayo, uMunatsi ulivumile icala lakhe andubana athi wayengenwe yimimoya emibi.

Ngemva kokulalela loludaba umantshi uMnumzana Lungile Ncube uqume ukuthi ababili laba ngamunye babhadale i$100 kumbe bavalelwe ejele okwamalanga angu-90.

NO COMMENTS

Leave a Reply