Ayihlabi Ngakumisa: Lulotshwe nguP Ndebele

26 Oct, 2017 - 02:10 0 Views

uMthunywa

Silo C Dube kugwalo
USWABIDE Khumalo, umphathisikolo weTotololo lanxa ezenza osebhodlile kusilingo sokufuna ukubulala ingane yakhe ekhubazekileyo, uNkosiphile, kahlalisekanga emoyeni. Uthi lanxa emphatha uNkosi kodwa uyamesaba. Udinga iqhinga lokuthi angahlali ekhaya lapho azabe engalali kuhle khona ngenxa kaNkosi. Uthi kumele ayehlala esikolo ngoba kulamatitsha, ikakhulu la angakathathi, adelela umsekeli wakhe uVundla.

UKhumalo uthi ubona kungcono ukuthi ayehlala esikolo aqede ukudelela kwalabobafana izinto zingakonakali kakhulu. Nxa ingafika ezindlebeni zabakhulu kwezemfundo indaba yabafana labo, kungeke kwamlungela yena njengomphathisikolo. Ukhuluma kanje esithi mfe uKhumalo. Uxotshwa ngezomuzi wakhe. Mubi uKhumalo ngoba ubefuna ukuchitha umphefumulo womntanakhe. Ulokwesaba ngoba inyanga uMahaqaza yamtshela ukuthi engehluleka ukuyibulala ingane yakhe engalingi futhi ngoba kungafa yena, into ayengafuni yenzakale kuye.

Wesaba uNkosi nje uKhumalo ngoba ethi umkhumbuza imisebenzi yabathakathi sonke isikhathi. Uyaqhubeka uKhumalo ethi kwakumele abone angakwenza ukuthi engaphindi futhi ukuganga emzini kayise. Wayezibuza ukuthi pho ayilungise njani indaba enjalo engekhaya emzini wekholwa elinguMaNdlovu. Kwasekusobala ukuthi uMaNdlovu likholwa leqiniso njalo loNkulunkulu amkhonzayo wayelamandla nanku phela uKhumalo wayesehlulekile ukubulala umntwana, uNkosi, owayeligugu likaMaNdlovu.

Uqamba amanga uKhumalo ethi isizungu sizamkhathaza kodwa avale ngokuthi wayezabesiza ukuzobakhangela.

Utshengisa ukuba yindoda uKhumalo njalo ngumkhokheli oqotho emsebenzini. Ukhuluma lokho afuna kwenziwe njalo intando yakhe kayeqiwa. Ubiza umsekeli wakhe uVundla besemsebenzini emtshela ukuthi kulomsebenzi afuna amenzele wona. Uyalandisa uVundla ukuthi wavusa ikhanda ebeka udaba lwakhe, amehlo ewabeke ebunzini likaVundla.

Banjalo abakhokheli kuzwa emsebenzini, bakhuluma lalabo abangaphansi kwabo bebakhangele emehlweni.

Uyawahwatshwa futhi amanye amanga umdala uKhumalo ethi ukuguga sekumenzela amanyala. Uthi nxa engahamba ibangana nje elingatsho lutho, alale engasalele, iqolo selitshisa vutha. Uqhubeka ethi usezadubeka-ke umntakaNdlovu, umkakhe phela, ngokulala elinde indoda endala igomela ubusuku bonke. Ngamanga asegcekeni wonke la akhulunywa nguKhumalo kulokuthi aluthi bhadla udaba olumsusa emzini wakhe.

Wenze nje uKhumalo usekhohliwe ukuthi kasawaqaphelisanga kuhle amanga akhe wokuthi uMaNdlovu kakho wayakwabo. Ubabaza konke lokhu uVundla kakezwa ukuthi indaba yeqolo idonsela ngaphi. UKhumalo uvala uVundla ethi walibala ukumtshela ukuthi uMaNdlovu sewaphenduka. Usuka lapho uKhumalo atshele uVundla ukuthi ufuna akhuphe abafana uDube loNkomo endlini yakhe ngoba usefuna ukuyisebenzisa njengoba esitsho ukuthi ukuhamba sekumehlula.

Ukukhuluma okobuphathi sibili uKhumalo ngoba uthi, “Ngifuna . . . ,” katsho ukuthi ngicela kodwa ukhuluma njengomuntu olegunya lobukhokheli. UVundla uthi uyezwa kodwa abuze njalo kuKhumalo ukuthi manje uzabakhupha ebafake ngaphi abafana laba njengoba esazi uKhumalo ukuthi ikomiti yesikolo kayikakhi ezinye izindlu zababalisi? UKhumalo uyamkhumbuza uVundla ukuthi indlu leyo athi abakhuphe kuyo vele yakhelwa umphathisikolo.

Nxa uVundla emkhumbuza uKhumalo ukuthi wathi bebehlezi ababalisi umtshela ukuthi wayebabolekile kabaphanga kokuphela. Ngegunya lobukhokheli uKhumalo utshela uVundla ukuthi usezakwenzanjalo ukuthi uzabafaka ngaphi laba bafana, ozabakhupha, wayezabona okokwenza.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds