uMthunywa
IMFUNDO ngumthombo wolwazi ngoba phela lezinsuku akula lapha ongaya khona ungelamfundo.
Abadala bathi inyoni zibanjwa zisemaphuphu kukanti amathole akhethwa kusakhanya ngakho-ke asigijimeni kusesemasinya.
Abantwana abanengi behluleka ukuthi bafundiswe ezikolo ngoba bengalazo incwadi eziqondileyo ezibavumela ukuthi bangene esikolo kukanti lasebadaleni kuyafana lakho ngoba ukuze uqhatshwe zikhona incwadi okumele zivezwe.
UHulumende ukukhangele wakubona kuqondile ukuthi aphathise uzulu ekutholeni incwadi ezifana lezokuzalwa kanye lezithupha ukuze bathole ithuba lokuvota ngomnyaka ozayo.
Zinengi izizatho ezibethwa ngabantu ezibenza bangabi lencwadi lezi eziqakathekileyo ezigoqela ukuthi kumele bazibhadalele, kodwa phela nanti ithuba elihle lokuthi abangelazo incwadi lezi babelazo ngoba inhlawulo obekukhangelelwe ukuthi abantu bayikhiphe ibekwe eceleni.
Siyambonga uHulumende ngokunika uzulu ithuba lokuthi abelencwadi eziqakathekileyo kukanti ingqobe isisalele umphakathi ongelazo lezincwadi ukuthi asukume aye lapho okubekwe lezindawo zokuthatha lezincwadi ukuthi ayethatha angelayo.
Kukanengi abanye beswela imisebenzi kukanti abanye abantwana bacina besehluleka ukuphatheka kumncintiswano yemidlalo kanye lokubhala imihloliso ngoba bengelazo incwadi lezi uHulumende asethe abantu bangazithatha kungelambadalo.
UHulumende usungule uhlelo oluphathisa umphakathi ukuthi athole incwadi lezi. Umsebenzi lo uqhubeka ilizwe lonke nje jikelele ngakho-ke kungumlandu wethu ukuthi sithathe incwadi lezi ezililungelo lethu ngokuba yizizalwane zakuleli esititshini sakini.
Inengi labantu abahlala emaphandleni abalalo ulwazi oluqotho ngokuqakatheka kokuthathisa abantwana incwadi zokuzalwa. Bonke abaqeqetshi esihlangana labo nsukuzonke abaphezulu labo baqala phansi ngokuthatha incwadi zokuzalwa kusiya kusiya.
Uhlupho ebantwini abahlala emaphandleni yikuthi abakunanzeleli ukuqakatheka kokuthatha incwadi zokuzalwa njalo kwesinye isikhathi bayayekela ukuthathisa abantwana incwadi lezi ngoba bevilapha ukuhamba imango emide besiya lapho incwadi lezi ezithathwa khona.
Wonke umuntu ulelungelo lokuthola incwadi yokuzalwa, isithupha kanye leyokufa nxa sethe wedlula emhlabeni.
Incwadi lezi ziqakathekile lakuHulumende ngoba ziyamncedisa ukwazi ukuthi kulabantwana abangaki elizweni, lokuthi abadala labo bangaki kanye lalabo abafayo ukuthi bangaki. Ukwazi inani labantu kuyaphathisa njalo uHulumende ekulungiseleni kumbe ekudingeni ukudla kwabantu nxa kuyikuthi kulendlala elizweni kanye lokunye okuqakathekileyo ekukhokhelweni kwelizwe.
Kungakho kungumlandu wethu sonke ukuthi sibe lencwadi lezi ukuze saziwe ngokusemthethweni.
Laloba sekuthathwa mahala amaphepha la esizwe akutsho ukuthi abasoze bebuze imibuzo ekuthatheni kwakho. Lezi zincwadi eziqakathekileyo kakhulu ngakho-ke ngazake uzithole ungazange uphendule imibuzo embalwa ngoba bakhona abangayathatha incwadi lezi ukuze bazisebenzise ukuganga.
