Uncategorized

‘Ngibulala 15 abantu ngenyanga’

05 Oct, 2017 - 02:10 0 Views
‘Ngibulala 15 abantu ngenyanga’ Usuka kwesenxele — UClara Chenjera, Sarah Chenjera loMatilda Chenjera

uMthunywa

YiNtatheli kaMthunywa
KULOMPHUROFETHI wesigodlweni eHarare odumileyo kulabo abakholwa kwezesintu othi ubulala abantu abangu-15 ngenyanga ngokubabisela ububi abayabe beloye ngabo abanye  okudume ngokuthi yi-“back to sender’’ ngesiLungu.

I-back to sender  yindlela esetshenziswa ngabaphurofethi lezinyanga ukubisela okubi, kungaba yimithi elimazayo, umbane loba ondofa emuntwini okuthumezileyo ukuze kumlimaze loba kumzwise ubuhlungu yena.

UBhishopu  Oliver Magaso, webandla leSpiritual Shield Apostolic Church eseHatcliffe, uthe ukubuyisela ubuthakathi kumnikazi akukubi njalo bayakwenza izikhathi ezinengi.

“Mina abantu bangabuya lenhlupho zabo okwami yikuthandaza kuNkulunkulu ngisithi  ‘‘Go back to sender’’ kusitsho ukuthi okubi akubuyele kumthakathi okwenzileyo. Angekela ukubuya ukuzovuma ukuthi wakwenza lokuxolisa uyafa kuphela, lapho angibuyeli emuva.

“Ngenyanga abantu abafa nge-go back to sender bafika itshumi lanhlanu. Bantu yekelani ukwenzela abanye ulunya, ngiyacela,” kutsho uMbhishopu uMagaso.

Uqhubekele phambili wathi wagcotshwa ngomnyaka ka1989 ukuba nguMbhishopu. Abanengi bayabuya lenhlupho zabo ezinjengalabo abafungelwe ijoyi, ukuthunyelwa umoya wokuthi behlelwe yingozi, ukungathathi loba ukungathathwa. Abanye badinga imithi yokwenza abantwana babanye abantu iziwula ngemimoya emibi. Konke lokhu ngiyabisela kubanikazi, bazaqedelena.

UMbhishopu uMagaso uthe ekwenzeni inkemba le (back to sender) usebenzisa izinto ezihlanganisela uchago, amaqanda kanye lamalembu abomvu.

Uthe ilembu elibomvu liqakathekile kakhulu ekwenzeni lokhu ngoba yilo elilwisana lemimoya emibi.

Intatheli zitshengiswe indawo eseduze ledamu lapho obekugcwele amalembu abomvu lezinye izinto ezilahlwayo, ezicina zitshiswa yizakhamizi ngoba sezizinengi.

Abakwazi ngalokhu okwenzakalayo bathi akulunganga lokhu ngoba sokuphambanisa ukuhlanzeka kwamanzi kanye lokubulala inhlanzi.

UMbhishopu lo uthe uphathisa abantu abanengi abagoqela  abahlabeleli, abakhulu bamasonto, abezombusazwe labadlali benguqu, bonke laba babuya bezophathiswa.

“Lapha akula ongabuyiyo, abahlabeleli bayabuya ikakhulu nxa belungiselela ukuya kuboChina bengakenzi imibukiso yabo. Abadlali bebhola labo bayabuya ngoba abanye abadlala labo balemithi okokuthi loba uyintshantshu enganani uyaqeda umnyaka ungahlohlanga,” kutsho uMbhishopu Magaso.

Ebuzwa ukuthi uyabhadalisa yini uthe kulemali ayibhadalisayo.

“Wonke umuntu obuyayo uhlawula imali esiyithi yi-church development fee, le yiyo esiyisebenzisa ukuthuthukisa isonto yethu ngoba kulabanye abavela phandle kwamazwe  anjengeKorea,   Japan leUnited Kingdom labo abayabe behlala kuma-guest house ethu lapho esibaphekela khona ukudla bencediswa,” kutsho uMbhishopu uMagaso.

Intatheli zikhulumisane lemuli yakoChenjere, yona etholakale kuMphurofethi lo ebihambe lomntwana  obegula umkhuhlane wengqondo osiliswe lapho nge-go back to sender.

UNkosikazi Sarah Chenjere uthe umntanakhe uMatildah Chenjere waqala ukugula ehlala lodadewabo uClara Chenjere.

“Ngathwala nzima kakhulu ukuze uMatilda asile. Wayesithi kungambamba aqale ukuhamba ngomgwaqo, umoya lo ubiza usithi ‘‘Ngifuna ukufa, ngifuna ukungxotshwa yimota’’.

“Besisehluleka ukumbamba angaqala ukugijima, yikho lapho engabona khona ukuthi umntwana sephambene ingqondo,” kutsho uNkszn Chenjere.

Uqhubekele phambili wathi walayelwa ngabanye abathola usizo kumbhishopu lo.

“KuMbhishopu Magaso ngamlayelwa ngabanye ababelezihlobo ezazigula umkhuhlane wengqondo ezancediswa nguye,” kuqhuba uNkszn Chenjere.

Amazwi la agcizelelwe nguClara othi umnawakhe wasizwa kakhulu.

“Umoya omubi ubusithi ungambamba atshone egijima ilanga lonke njalo kungela ongambamba ngenxa yolaka ayabe eselalo,” kuphetha uNkszn Clara.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds